為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 10 月 29 日

國教軍師介入 佔領運動激化

佔領運動處於膠着狀態,由學聯、學民、佔中三子、泛民及民間團體組成的「五方平台」,內部角力愈趨白熱化。上星期無端端爆出要搞「廣場公投」,跟住四日三變,最後臨時又取消,過程夠晒兒戲,反映內部各陣營歧見幾深。

知情人士向本刊透露,「廣場公投」出現,原因與學民思潮的「軍師」韓連山等一班激進老鬼背後出手有關,「上星期二學生同政府會面後,民氣好撐學生,韓連山強烈建議要擺硬姿態,重提最初的叫價(公民提名同撤人大框架),新婦女協進會創辦人何芝君亦加埋把口要企硬,結果搞出一個公投建議出來。」

學聯周永康(左二)、學民黃之鋒(右二)各有自己的部署,公民黨梁家傑這類泛民政黨又有自己的盤算,戴耀廷(左)要靠邊站,內部分歧已見激化。(林崢攝)

韓連山與何芝君喺國教事件中,一直被視為學民思潮的軍師,今次佔領運動爆發初期,兩人亦有在背後指點,今次更在「五方平台」成為主導聲音,反映群眾運動被更激進的聲音主導。

由於韓、何兩人對學聯學民有影響力,泛民政客好不滿,一向幾支持學生的張超雄都忍唔住口批評,再搞公投只會亂上加亂,而民主黨黃碧雲更極力呼籲,現階段已無任何團體可以控制現場,最好就將問題交畀立法會議員,政治問題議會解決至實際。

泛民立法會議員講到明要奪佔領大權,喺運動中玩到high晒一班學生領袖又點會肯放手?尤其係以總指揮自居的周永康更加不會放權。最近有批佔中義工離場走人,就係因為周永康等人已激進到不可理喻。

韓連山(右)、何芝君(左)兩大國教軍師早在罷課啟動時,已在幕後支持學生,現時學生佔領行動進退失據,再出手力挺走激進路線。

據知情者話,佔中內部本來有一個由學聯、學民等十人組成的指揮小組,中大學生會會長張秀賢係核心之一,佢本身亦係學聯常委,喺內部屬較理性一派,經常反建議唔好過火位,要知所進退。

警方放催淚彈後,佢已提議撤離,準備同政府展開對話時,佢又建議象徵式做幾個示好姿態,等大家多啲空間傾,幾有談判計謀。

不過周永康認為呢類意見只會長政府志氣,滅學聯威風,試過有幾次會議當住其他學聯常委面前鬧張秀賢「冇骨氣」。同政府的對話更索性飛起張秀賢,只挑選同聲同氣的自己友。

有佔領義工亦透露,周永康的指令亦好混亂,現場好多團體都無所適從,而好多示威者喺馬路留守餐風宿露,但據講周永康同一班領導,就好少見喺現場留宿,多數匿喺李卓人等立法會議員休息室,有冷氣有地鋪,令不少人都有微言。

廣場公投因內部反對聲浪大而爛尾收場。