港產勢力
近年我大力支持香港電影嘅發展，作為電影人，我梗係樂見港產電影！今晚其中一位「Paco巨星飯堂」嘅嘉賓黃玉郎兄（Tony）亦係一樣，佢最近監製一部新電影《我們停戰吧！》，劇本就係出自新編劇兼女主角林熹瞳（Rachel）手筆。我邀請兩位加上有份參演嘅張文慈（Pinky），去到位於荔枝角嘅西班牙餐廳「Rustico」，一邊品嘗特色西班牙料理，一邊暢談電影經。
今晚我帶Pinky、Rachel同Tony（左至右）去到「Rustico」品嘗西班牙菜。大談新電影《我們停戰吧！》。
Rachel初試「提筆」撰寫劇本，得到Tony賞識。
支持新人
Tony喺漫畫界嘅地位，相信唔使我多作介紹，其實佢有一顆愛電影嘅心，就一定係鮮為人知。「我一直都好鍾意電影，尤其係香港出品嘅，近年我好鍾意《警察故事》，好有香港特色。
「我喺80年代都有投資過電影，都係因為題材吸引我，不過我係以不記名方式投資，同今次有少少唔同。今次係因為我睇咗個劇本，覺得好有感覺，所以先決定投資。況且新人係需要有機會先可以發揮才華，Rachel係一個好有潛質嘅編劇，劇本言之有物，係值得支持嘅。」
哈哈哈！「惜才」先會令香港電影業發光發熱，Rachel畢業於演藝學院，係「紅褲子出身」，我先請佢自我介紹一下。「我曾經喺『有線』擔任《怪談》主持，之後加入咗『香港電視』做演員，就係因為咁，就識咗一班好有才華嘅電視人，今次電影嘅導演陸天華，都係『港視』其中一位出色嘅導演。
「仲有唔少演員，好似威哥艾威、湯怡、美棋BB，我都係因為『港視』同佢哋熟落嘅。至於寫劇本，係我一直以嚟嘅夢想，我想藉住我寫嘅劇本，去表達我自己嘅想法。」
西班牙些厘酒煮黑毛豬辣肉腸（$68），係佐酒佳品。
安達盧西亞式脆炸魷魚（$68），即加入白酒、青檸製作，酸咪咪夠開胃。
焗特色新鮮西班牙番茄香蒜橄欖油麵包（$42），味道層次豐富。
手切特選伊比利亞5J火腿（36個月）（$240），係頂級火腿，rich而不肥膩。
港人港事
究竟Rachel寫咗一個關於咩題材嘅劇本，吸引到Tony投資？Rachel表示：「劇本係講一啲我對香港嘅感覺，包含咗好多香港人會有共鳴嘅事。我喺入面加咗關於回歸、沙士、推行國民教育等等嘅大事，係因為我覺得局勢有啲混亂，想寫吓自己嘅心聲。
「電影係想帶出香港同中國就好似一個家咁，無論有咩爭執，都唔係以個人利益作為出發點，冇檢討嘅話就無進步，我希望呢部電影可以提醒香港人，要愛呢個地方。」
咁有意思、有深層訊息，難怪吸引到Tony投資。除咗Rachel喺「港視」結緣嘅演員，Pinky係另一位有份參與演出嘅出色演員。「今次第一次同Rachel、導演合作，我覺得劇本寫得好，係最重要，入面有好多唔同嘅元素，唔少仲係香港人一定會好有感覺嘅，令到我更加容易入戲。」
Pinky（左）對Rachel（右）嘅劇本亦讚口不絕。
Tony熱愛電影，所以會落力推廣好戲。
生西班牙紅蝦薄片伴特製西班牙番茄甜椒汁及茴香柚子醋汁（$158），鮮甜！
香蒜橄欖油炒海蝦（$112），製法簡單但最考功夫。
行山養生
集情懷同演技派於一身，Rachel今次嘅處女作品，真係要拭目以待。雖然之前嘅拍攝工作排得密麻麻，但Rachel表示佢嘅食慾並未因此而減少。「我會緊張，亦都會成日諗住開工、分場嘅事，有時會搞到失眠。不過食嘢我係OK嘅，我都好鍾意食，最鍾意食日本菜，因為份量同賣相都合乎我嘅要求，哈哈！」
我好欣賞Tony（左二）嘅作品《龍虎門》，所以合照時都要模仿一下王小虎嘅「降龍十八腿」！
今晚有老闆Eric（左三）及大廚（右三）悉心安排，我同一眾嘉賓都盡興而歸。
另一位女士Pinky，就表示：「我都好鍾意食嘢，通常最enjoy係同一班朋友一齊，一邊食一邊傾，好似o依家咁。」
Tony大表贊同，同時亦分享咗佢keep得fit之道：「食得豐富，我o依家會行吓山，做吓運動。一個禮拜起碼行一次，一行幾個鐘，行咗山精神真係好啲o架！以前我係唔做運動嘅，o依家一開始就要行晒成條路為止！」
哈哈哈！Tony持之以恒，證明有時付出同收穫係可以成正比o架！
傳統烤西班牙乳豬伴焗馬鈴薯（$295），皮脆肉juicy。
Rustico招牌西班牙海鮮飯（$165），落足料花足心思炮製。
杧果雪糕伴凍紅莓湯及脆脆（$55），極為搶眼。
另一道甜品係焗香草酥皮卷伴紅莓汁（$52），冷熱兼備。
Rustico
