為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2009 年 10 月 06 日

阿湯與三大狀不和 早有離心

湯家驊擺明反對余若薇等提出的「總辭」方案,如公民黨照去,他就退黨。

踏入十月,阿爺賀大壽,周圍都紅彤彤喜氣洋洋,但泛民就慘啦,不單止頭頭碰着黑,內部鬥到烏天暗地,仲爆出一單甘乃威「求愛不遂炒女助理」風波,可以話係「黑色十月」。

阿甘單嘢,留番畀今期「封面故事」詳細報道,小弟特別想講吓湯家驊公開同公民黨唱對台嘅來龍去脈。

阿湯乃創立公民黨嘅「四大狀」之一,在黨內屬重量級,早前余若薇、梁家傑同吳靄儀三大狀與一眾高層提出「三部曲」方案——先談判,再五區議員辭職,最後二十三個泛民議員齊齊劈炮,成套嘢仲激過毓民長毛,到最近阿湯忽然在傳媒高調反對「總辭」,仲話如果公民黨一意孤行,佢一定唔跟大隊辭職,寧願退黨走人。

線人話,阿湯今次突然「爆發」,其實谷咗好耐。最初毓民提出「五區辭職」,阿湯已在黨內表示呢套嘢行唔通,一直大力反對,初時余若薇及梁家傑對此都有猶疑,但「強硬派」嘅吳靄儀同毛孟靜就好贊成,一眾「青年軍」亦多數認為應玩鋪激嘅,而李柱銘、陳太等又在背後谷班友去馬,大夥最後搞出更激嘅方案,阿湯嘅意見完全被㩒低,當然極之唔高興,於是在黨內話自己一定唔會辭職,如果個黨要佢咁做,佢咪散水囉。

本來阿湯只在內部「呻」,答應唔公開講,唔想外界覺得公民黨分裂,但本欄於上期將此事爆出,佢見已經通天,便順勢在傳媒盡訴心中情。

阿湯今次咁決絕,其實背後仲有幾個原因。公民黨成立時,阿湯以「開國功臣」自居,而且佢老哥向來自命不凡,認為自己應該坐黨魁個位,但一直以來佢都係唔上唔落,黨魁個位畀余若薇坐咗,內部又被掌控「意識形態」嘅吳靄儀吓吓「食」住,令佢不滿兼冇癮。至於梁家傑,阿湯認為自己在行內資格比傑哥高,但黨內地位同傑哥咁上下,早已悻悻然不是味道。因此,阿湯同「三大狀」長期以來早已面和心不和。

阿湯意興闌珊,另一原因係佢屬於理性溫和派,唔想同阿爺硬鬥硬冇彎轉,因而被視為軟弱縮骨。佢早前就自爆,話曾經在黨內建議畀佢三個月時間,秘密在幕後拉線,安排特區政府、中央同泛民閉門共商,但班大狀完全唔buy,最後公民黨推出個「激進」方案,同阿爺密斟已經冇可能,佢覺得班友唔識策略搞到硬晒軚,實在好戇居!

對於二十三個議員齊齊辭職,阿湯當然唔想跟大隊,因為佢心知上次普選自己差啲滑鐵盧,如果今次貿然辭職,新界東隨時有成棚人出嚟搶位,佢想選番入局,談何容易。明知係咁,絕對博唔過,冇理由作無謂犧牲吖。所以阿湯同黨內班友講,醒吓啦,唔好咁naive好唔好!

今次阿湯公開發難,民主黨班友好可能借勢話泛民要團結,唔好搞總辭啦。線人話,何俊仁等民主黨主流派一直唔贊成呢套,但又驚被指衰仔,所以拖吓拖吓,阿湯開咗個頭,加上華叔又反對,佢哋就可以提出重新討論。

阿湯長期被吳靄儀「食」住,一直心懷不滿。

鬍鬚曾病牀讀秘笈 研金融海嘯教訓

鬍鬚曾急性心臟病要通波仔,復元得好快,瞓咗幾日醫院,上周六就精精神神出院,睇嚟乜事都冇,原定周二至開工,但佢急不及待,周一就返辦公室處理文件,認真工作狂。

佢今次冇事,真係要劏雞還神,官場老友話,當日情況真係極之緊急,遲少少入醫院就玩完。佢由美國飛返香港途中,一直冇乜異樣,唔覺得唔舒服,返到屋企沖完涼等食飯就覺得心悶胃頂,太太同佢量血壓,見到低好多,知道大件事,立即call白車送去瑪麗,同一時間醫院已急電心臟科主管李偉聯醫生火速趕回。鬍鬚曾一到,李醫生就同佢量血壓,嘩,低到咁,一定係心肌function唔到,於是馬上做通波仔手術,如果再遲啲,心肌可能壞死,就冇得救。

通完波仔,鬍鬚曾冇晒事,病房內冇電視又冇電腦,佢無所事事,唯一kill time方法係睇書。佢老哥身卧病牀不忘經濟危機,幾日內睇咗幾本關於金融海嘯成因同教訓嘅著作。本來呢類書刺激心臟,不適合佢睇,但佢養病仍掛住抗災,醫生都冇佢符,由得佢啦。

鬍鬚曾出院,太太笑逐顏開。他卧病期間連睇幾本關於金融海嘯的書。

劉秀成爭財委主席 強勢挑戰卿姐

講開泛民「黑色十月」,仲有一單嘢。立法會休會完畢,某些委員會嘅正副主席爭奪戰又告開始,其中財務委員會及政制事務委員會主席一職,泛民與建制派都視為兵家必爭之地。

財委會幾年來一直係卿姐嘅囊中物,建制派人馬陳鑑林同黃宜弘幾次爭奪都飲恨,自然心有不甘,因為呢個位冇理由畀卿姐霸住,一定要諗計取而代之。

經過一番商討後,建制派達成共識,決定搵現任副主席劉秀成出馬挑戰卿姐。

今次建制派計過數,如果派陳鑑林上陣,獨立議員可能暗中轉軚,黃宜弘又輸形象,最好由形象唔錯嘅劉秀成參賽,估計可取得泛民以外其他各派嘅支持,贏面好大。卿姐過往屢創奇迹保住個位,但今次未必能如願,若然如此,泛民又失一城,都咪話唔黑!

卿姐今年遇勁敵,可能保不住財委會主席個位。