為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 10 月 14 日

關慧玲

《東周刊》社長兼總編輯。

喺慈雲山長大的許Sir

佔領運動曠日持久,在種種令人緊張、焦慮的事態以外,難得有一點透氣位,就係每日睇由警察公共關係科總警司許鎮德主持嘅記者會。呢期佢喺網絡爆紅,網民仲同佢搞咗個「四點鐘許Sir」網頁,至今有幾萬個like,喺警民關係緊張之時,許Sir都算係奇葩咯。

筆者問過佢一些粉絲,大家都話許Sir說話不會一副高高在上的口脗,態度誠懇就好似一個朋友同你分析問題一樣。最初佢上鏡較嚴肅,其後面容放鬆不少,加埋佢梳得高高的蛋撻頭、獨特的英語口音,好有親切感喎。每當佢重複講「I will now recap in English」時,大家就會會心微笑。

「四點鐘許Sir」講佔領運動,網民自然會關心,原來專頁裏的「許Sir」仲會回應粉絲留言,或者張貼粉絲的改圖,這些互動元素亦吸引網民分享專頁。上星期突然有一日唔見咗佢,網民竟然起哄,問許Sir去咗邊,搞到當日幫手做記者會嘅高級警司江敏強都笑話:「你哋仲有機會見到許Sir嘅。」

許Sir係老差骨,八六年喺浸大生物系畢業後就即刻加入警隊,做咗接近二十八年,接觸過不同崗位,曾經指揮過一次掃黃大行動,一次過拘捕百多名妓女及馬伕。

聽識佢嘅朋友講,話許Sir仲做過三年幾特首副官,當時佢負責陪住特首曾蔭權出席不同場合,負責安檢等工作,如果大家有留意,曾蔭權落區去視察西貢車禍,仲有墮(車立)意外現場,或者都會見到許Sir身影。

佢老友仲爆咗許Sir一段料,佢細個原來喺慈雲山邨長大,該區品流幾複雜,不時有蠱惑仔蝦蝦霸霸,許Sir細個同哥哥落球場踢波時,都試過畀懷疑係黑社會嘅人兇過,可能因為咁,佢自細已立志做個好警察,警惡懲奸。

呢排打大仗,許Sir同好多同袍一樣,無日無夜留守總部,就連想同老婆仔女傾吓偈都無時間。平日佢最鍾意打羽毛球,係警隊羽毛球會主席,不過o依家咁情況,當然無得打了。

警察是人民公僕,但呢排警民關係持續緊張,筆者做警察嘅朋友都好無奈,呻話市民乜嘢都會搵警察,也信任警隊中立,但經這兩個多星期折騰,世界好似反轉咗。更無奈嘅係,佢哋工作時夾喺示威者與市民中間,朋友間聚會又往往因為佔領運動拗至面紅耳熱,佢哋亦變咗夾心人,所以呢排如非必要,佢哋暫時都會避免去朋友聚會,費事唔知講乜好。