為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 10 月 07 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

大導笑了

我知道你哋係「金牌飯局」嘅忠實擁躉,所以我邀請你哋一齊同我分享「金牌飯局」4周年嘅happy dining,地點係我心水食肆之一「囍相逢」,想參加?密切留意「金牌飯局」!

做得我嘅忠實fans,你一定知道我正喺影圈大展拳腳,亦認識到唔少好友,今期嘅嘉賓邱禮濤(Herman)就係我嘅影壇酒腳之一。

大家唔好以為Herman一頭長髮加嚴肅嘅面孔,就以為佢不苟言笑,其實大導有一顆善良的心,不論喺片場還是平時待人一樣咁平易近人。而最為我欣賞嘅係Herman對音樂都有一份堅持,佢係典型嘅「Rock 'n' Roller」,依家仲係band友嚟㗎!好友相聚,加上影壇新人冼色麗(Bonnie),我哋齊齊捧起矜貴嘅magnum size Lafitte紅酒,自然笑得特別燦爛。

雖然我係whisky嘅fans,但係喺Magnum size嘅Lafitte面前,我選擇屈服,搵埋Herman(中)及Bonnie(右)陪我囉,哈哈哈!

Magnum size可以將紅酒質素keep得同入樽前嘅味道最相近。

大讚Kay媽

雖然我係whisky嘅擁躉,但係一見到今晚嘅飯局地點「Domain 223」,喺大門嘅酒櫃擺放咗名貴嘅Lafitte,都抵受唔住誘惑,請Herman同Bonnie一齊舉酒拍照,點解?因為你哋平日飲嘅紅酒,只等如呢支magnum size嘅六分之一,要知道紅酒離開釀酒木桶後,儲放嘅容器愈大就愈能夠保持味道,所以呢支magnum Lafitte,特別矜貴。

Herman係rock友,唔使拍戲嘅時候都會同好友摸吓酒杯底,同我啱晒key。「真係要唔使開工嘅時候,我只會飲番兩杯,喺片場我係滴酒不沾嘅,費事其他人有樣學樣啦!有人話飲咗酒會好feel啲,可惜酒精喺我身上,喺呢方面就一啲都唔work,反而專心啲好過。」

Herman為當榜樣夠晒用心良苦,所以佢可以用極速完成《Laughing Gor之變節》,仲火速有靈感開拍《死神傻了》,為一班影壇新人創造就業機會。「我一直諗,唔少死亡個案都喺電光火石間發生,好多人喺臨死一刻都趕唔切去思去想就已經一命嗚呼,尤其係意外嘅死者,而我呢部戲就係關於一啲橫禍嘅死亡個案。」

除Bonnie外,戲中係有陳偉霆、周秀娜,甚至依家炙手可熱嘅謝安琪(Kay),Herman大膽採用影圈嘅新人原因究竟係咩呢?「其實新人會特別用心,因為佢哋都想武裝自己,所以對每一項細節都會留心,當中阿Kay真係專業到頂點,佢嚟埋位之前就已經熟讀劇本,有咩唔明都會預早講,所以我哋拍親有佢份嘅戲,都好快收工㗎。」

哈哈哈!所以你哋唔好以為成功係一件輕而易舉嘅事,阿Kay就係一個成功需苦幹嘅人辦。

Bonnie話個龍蝦湯夠晒香濃,啱晒feel。

堅毅新人

Herman係「Rock 'n' Rollers」,佢做事都有rock友嘅認真精神,佢喺選角方面都非常用心,好似佢今次揀Bonnie參與《死神傻了》嘅拍攝咁,背後原來有一個故事㗎。「我睇過Bonnie喺《青苔》入面嘅演出,佢喺戲入面飾演妓女,令我印象好深刻,加埋佢之前訪問過我一次,所以今次就搵咗佢飾演William(陳偉霆)嘅女友『Angelinababy』。

「我記得佢訪問我嘅時候好緊張,初時仲以為佢埋位都會有啲怯場,但後來開拍先至見到Bonnie嘅潛質,都好surprise。」

Bonnie聽到導演嘅讚賞,即刻面紅,哈哈哈!新人要畀啲信心自己,我就畀你講吓你對事業嘅理想啦!

「我依家仲有好多嘢要學,之前喺《星光熠熠耀保良》跳舞,我都會覺得自己好似喺咁多個女仔之中跳得最差嗰個咁,所以我就再學跳舞,希望將來用得着啦!

「其實喺呢個stage,我嘅理想係做好每個job,今次拍《死神傻了》,跟住導演學到好多嘢,我相信嚟緊可以學以致用。」

「Domain 223」嘅菜式以套餐形式待客,一餐豐富嘅午餐(或晚餐),包括湯、前菜、主菜同甜品各一,只係百零蚊,抵!

與酒會友

新人好似海綿咁,可以有無限嘅吸收力,只要佢肯吸收,潛力可以無限大,Bonnie,祝你成功,乾!

講起潛力,依家電影圈復興,你估Herman對影壇有咩新諗法?「電影同Rock 'n' Roll一樣,never die!因為兩者都係一種好好嘅抒發情感用具,好容易令人有共鳴,除咗文字以外,音樂同電影都係無價,只要我哋用心製作,就可以keep住強勢。」

哈哈哈!講得好,你話我邊有可能同Herman唔啱嘴形呢?今晚我仍然帶住我嘅Glenlivet 18年單一純麥whisky去到「Domain 223」,同Herman、Bonnie把酒談心,仲巧遇小欣姐查小欣同場,咁有緣,真係要乾杯慶祝,乾!

雖然呢一晚喺「Domain 223」有靚紅酒,但我都帶咗whisky同好友分享㗎,乾!

Domain 223
地址:觀塘偉業街223號觀塘223 Tower A 3樓
電話:3925 7088