煲電話粥的回憶

我哋細個嗰陣冇手提，屋企都係用撥輪電話，好得意，打一個電話，去到第七個number打錯咗呢，就要等個輪跌番落嚟，先可以重頭打一次！我覺得嗰陣我嘅耐性真係好啲囉，哈哈哈！同埋呢，打電話約朋友嗰陣都好正o架，係expect一定要見到對方囉！

至於煲電話粥呢，我係去到十八歲先開始。嗰陣我有個女仔朋友，將我嘅電話交咗畀一個另一間學校嘅男仔，我同佢未見過o架，但就係咁我哋日日都傾電話，傾啲無聊嘢，傾得最耐一次，都傾咗三個鐘，跟住我哋就做咗朋友，不過都係一直都冇見過面喎，哈哈哈哈！我亦都試過因為咁，返屋企等電話，每次電話一響，就會好期待係咪佢呢？不過如果等電話時，有人傾得耐咗呢，就會好忟憎，係後尾屋企電話有call waiting出現，咁就好啲。同埋再後來仲有嗰啲三人會議呢，我朋友試過一次過十二個人一齊傾電話o架！

我到十八歲先開始學人煲電話粥，不過o依家都已經好少有人會咁做，連我屋企嘅固網電話，因為好少用，都cut咗囉。

仲有以前啲電話冇phone book，要記number，唔見咗就瀨嘢，所以我哋屋企都會好似其他人屋企一樣，喺個電話旁邊黐個phone list，諗起都覺得幾好笑o架！

我哋嗰陣除咗煲電話粥，仲有penpal。嗰陣時睇（英文）報紙，有一個位置（徵友），係叫人如果想有個penpal呢，可以寫信去畀佢。我哋嗰陣時好無聊，我記得有個penpal喺印度，我哋都有寫信畀佢，好多嘢寫嗰喎，然後就好期待去等佢嗰封信嚟，跟住收到就會好開心，要食完飯先至慢慢去打開佢，回番信時又會好畀心機去畫啲《橙路》公仔喺側邊，又會貼啲貼紙……呢啲都係我同我阿妹八、九十年代嘅美好回憶。