為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 10 月 13 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

喜用屍.型

能夠配得上「型」呢個字而又係我欣賞嘅男星,安志杰(Andy)係其中一位,所以我除咗邀請佢同Jessica C.擔任今次「Paco巨星飯堂」嘅嘉賓,仲一早盡攬呢pair悅目卡士,演出「太陽娛樂」投資嘅新戲《屍城》,狙擊喪屍。有一對咁有觀賞價值嘅男女主角,即刻加晒分!

我就帶兩位主角去到位於銅鑼灣怡東酒店嘅「怡東軒」,品嘗既有特色又揚威比賽嘅菜式,率先慶功!

我帶Jessica同Andy品嘗「怡東軒」嘅特色中菜,精緻講《屍城》。

Andy(右)同Philip(左)係好兄弟,亦唔係首次合作,但將功夫同喪屍混合,今次係第一次。

兄弟同心

以喪屍為題材嘅電影,喺亞洲少之又少,所以今次Andy係興奮接戲。「我一直都係zombie movie fan,我好鍾意打《Biohazard》,所以一知道喺戲入面可以飾演打zombie嘅警察,就一口應承接拍。」

哈哈哈!題材以外,Andy仲透露咗另一個「閃接」原因。「因為今次有Philip(伍允龍)擔任動作指導,哈哈!我同佢係好兄弟,拍住上就拍得更加開心。喺戲入面我同Philip嘅角色係對立嘅,最尾一場決戰戲仲係我哋對打,我哋好清楚對方嘅長處,而且好多時都為咗出嚟嘅效果而嚟多一take。

珊瑚白玉球係Andy至愛,冬瓜球上拌上蟹皇汁加上炸鮮淮山,睇、食都係享受,唔怪得獲得香港旅遊發展局「美食最大賞——金獎」。

驟眼睇會以為生煎鮮菌,其實內裏先有乾坤,有心思。

「Philip好有leadership,佢知道我做咩動作出嚟係最好睇,我會盡力配合佢,所以我好enjoy成個過程。」

動作上有好兄弟,Andy話佢戲中嘅敵人,即係喪屍都幫到佢入戲。「係呀!今次負責特技化妝嘅係連凱,佢係有晒荷李活特技化妝嘅經驗,所以啲zombie妝化得好逼真,我見到飾演zombie嘅演員化好妝,就更加入戲。」

雙生金魚餃分黑眼同橙眼,黑為素餃、橙為蝦蛟,巧手炮製。

瞓身演出

至於女主角Jessica,同樣要應付唔少動作場面。「我喺戲中嘅男朋友,係畀喪屍殺嘅,跟住我就要同佢哋對抗,又要不斷逃命,過程中就唔少得比較性感嘅造型。

「今次係一個好得意嘅經驗,導演(錢人豪)對影像嘅控制好好,所以佢喺教我走位,畀反應嘅時候,已經好清楚咁話畀我知佢要啲乜。我覺得打喪屍係一件好唔真實嘅事,但係導演一嗌:『Action!』,我就好自然投入到。」

哈哈哈!既然Jessica同Andy都全情投入,加上喪屍片喺亞洲市場極度渴市,又點會唔會令人期待?

Andy係我欣賞嘅男星之一,佢同Jessica都潛力無限。

Jessica喺戲中瞓身演出,真係要拭目以待。

怡東酒店嘅餐飲部總監鄔智明(左一)同中菜行政總廚黃永強師傅(左二)精心為我哋安排菜式,非常貼心。

清淡健康

能夠被選中飾演「Kill屍」勇士,Andy嘅巨肌已唔使我多介紹,點保持迷人巨肌?佢表示:「其實我係好為食嘅,喺台灣拍《屍城》嘅時候,我啱啱喺美國放完假,因為太relax太放縱自己,就肥咗成20磅。咁喺美國好多我鍾意食嘅嘢,忍唔到口就要事後減磅。我只係食蔬菜、烚雞肉,同埋狂做gym,好快就瘦番落嚟。」

Jessica就話:「我都好鍾意食,但係要做嘢嘅話我都盡量忍口,以生果、蔬菜為主。做運動係好重要,我會跑步同做gym,得閒我都會做一個鐘。」

Andy同Jessica為部戲全程keep住狀態,我率先慰勞佢哋,順便預祝《屍城》票房節節勝利!乾!

紅豆沙選用日本紅豆及廿五年陳皮製作,兩卷則自家鮮磨,有heart。

香葱蟹肉燴飯係另一道獲「美食之最大賞——金獎」嘅菜式。

琥珀魚片脆卜卜,最啱佐酒。

漁港故事係甜酸脆鱔柳、花膠釀竹笙同金湯雲腿配南瓜汁,誠意十足亦大有來頭,係「香港美食大賞——最高榮譽金獎」得主。

醬燒牛肋骨,肉燒得juicy,要試!

怡東軒

地址:銅鑼灣告士打道281號怡東酒店2樓
電話:2837 6790