為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 10 月 06 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

5美上雲霄

今晚「Paco巨星飯堂」嘅嘉賓陣容,可以話係破天荒嘅美女陣!DaDa(陳靜)、新「晶女郎」Connie(文凱玲)、Bella(羅子喬)、Hazel(唐紫睿)同Iris(鍾采羲),集演技、性感、可愛於一身。能夠集合5位各具特色嘅美女,只因新戲《唐伯虎衝上雲霄》。

電影糅合受歡迎嘅商業元素,我就帶5位嘉賓去到位於天后嘅「藩壽司」,只因一個元素:美味!咁先可以讓佢哋暢談「上雲霄」背後嘅故事,亦可開心share飲食之道。

今晚我帶Hazel、Iris、Connie、DaDa同Bella(左至右)5位美女,去到位於天后嘅「藩壽司」,歎住日本菜暢談佢哋拍攝《唐伯虎衝上雲霄》嘅趣事。

橫店真感情

電影我已經先睹為快,感覺上,戲集機師、穿越、美女等受歡迎元素於一身,放喺國慶檔期上映,足以代表港產片。今晚5位嘉賓,喺戲中分別飾演石榴(DaDa)、秋香(Connie)、春香(Bella)、夏香(Hazel)同冬香(Iris),與3位男主角杜汶澤、肥仔聰及何浩文,大演對手戲鬥放笑彈。

飾演石榴嘅DaDa,就表示今次係佢嘅演技大考驗。「一直我都覺得苑瓊丹飾演嘅石榴姐好深入民心,因為冇人冇睇過佢咁好嘅演技,所以對我嚟講係一項挑戰。

DaDa喺戲中飾演石榴(上圖),佢表示動作場面亦係佢對自己嘅另一考驗。

「不過再次同阿澤合作,佢可以令我好relax去搞笑,加上我喺戲入面有打鬥場面,我諗出嚟嘅感覺會好唔同。」

最令DaDa印象深刻嘅,係同整個劇組「共患難」。「我哋喺橫店開工嗰一個禮拜,天氣好凍,成隊crew都病晒。雖然我哋交叉感染,但個個都為咗部戲捱夜,好齊心,我好感動。」

觀眾大概只可以睇到演員喺台前落力搞笑,其實佢哋喺幕後嘅努力付出,一樣咁值得like!

特上壽司盛($280)以每日新鮮運到嘅材料炮製。

帆立貝牛油燒($98),鮮甜美味。

特上刺身盛($420)令眾靚女嘉賓都食指大動。

為食新女神

Connie同DaDa一樣,對喺橫店嘅拍攝一樣咁回味。「不過我就為食啲,最記得橫店嘅好伙食。雖然好多人都病咗,但係我哋都日日去食茶餐廳、打邊爐,成隊crew開工一齊,食飯亦都係一齊,好close。」

今次Connie喺戲中有非常性感嘅演出,身為新一代「晶女郎」,晶哥要捧佢成為香港嘅Meg Ryan(美琪賴恩),都要Connie有專業精神,為藝術犧牲。「我諗今次我飾演嘅秋香,係史上最少布嘅秋香,拍嗰幕出浴戲,我真係全裸上陣,只係喺重要部位黐膠紙咋,呢個亦係我喺目前為止最性感嘅演出。」

Connie(中)同Iris(左)喺橫店都係零食王,難得仍可keep得驕人身段。

美食當前,Iris(左)同Hazel(右)都先放下儀態。

Connie身形甚fit,但佢表示從冇刻意收身。「喺飲食上我係極之唔健康,菜、生果我都好少食。上橫店嘅時候,我仲帶最多零食去開工,薯片、雪糕我最鍾意食!」

呢個時候Iris亦即時補充:「Connie啲零食我諗我幫手清咗一半,我哋好miss橫店嘅手抓餅,一講到食我哋就充滿力量!」

哈哈哈!睇佢哋嘅fit爆身形,又點會估到兩位宅男女神居然係愛食之士?真係只可以話係天生麗質!

餐廳嘅鐵板師傅系出名門,出身名店「稻菊」,鐵板鮑魚($120、上圖)及鐵板大蝦($98、下圖)均可試出功架。

各有飲食經

喺橫店拍外景嘅時候,除咗Connie講嘅茶餐廳、打邊爐;同Iris講嘅手抓餅之外,Bella表示:「其餘時間我哋都鍾意食烚蛋、烚雞肉、烚菜。因為阿澤食得好健康,所以我哋都學佢,食清啲。」

Hazel係另一位晶哥力捧嘅新人,佢話:「白烚嘅材料其實都係我平時經常食嘅菜,我最鍾意孭個背囊落街買餸,跟住自己煮飯,出面食嘅嘢太油膩,都係自己煮健康啲。」

我同5位嘉賓都對菜式相當滿意,梗係要同老闆們及師傅合照留念。

Bella、Connie、Iris同Hazel(左至右)4位「春夏秋冬香」都把握機會selfie一下。

DaDa亦都「幫口」:「雖然自己煮係最健康,但好多時因為工作都要喺街食。今晚就最好嘞!Paco你帶我哋食日本嘢,我知道食sashimi蛋白質高,對皮膚好,我好鍾意食o架!」

哈哈哈!美食當前,DaDa都抵受不住誘惑!我就預祝《唐伯虎衝上雲霄》,唔止佔領丫嬛咁簡單,一於佔領票房!乾!

和牛黑松露櫻花蝦土鍋飯($280)和牛同黑松露配合得啱啱好,香氣四溢。

北海丼($148)落足料炮製,令人回味。

餐廳特別推介兩款美酒,詳情請致電查詢。

藩壽司


地址:天后銀幕街21號地下
電話:2566 2808