西方大國外交官 籲袋住先
早前有人喺某飯局中，遇見西方大國嘅駐港外交官，對方以為佢一定撐佔中，點知佢竟然話「袋住先」好，在場人士聽到呆晒。該西方大國外交官講明係佢個人意見，但外交官邊有個人睇法o架？佢繼續話提名有限制，的確令某些人不能參選特首，但也無辦法，香港人如不接受，恐怕會出現大問題，會影響香港繁榮穩定，管治亦會出現困難。他認為有兩三個候選人畀市民揀，可以提高特首認受性，特首認受性強，可以改善行政立法關係。這外交官接受一人一票已係普選，而一七年特首選舉向前行一步，二○年立法會選舉又可以改進，否則不斷爭拗沒完沒了。他又相信香港制度好強，實行普選後，應有良好結果。
與會者無想到佢咁坦白，傳聞這態度和部分泛民元老亦相似，據聞呢位外交官都同泛民金主肥佬黎、李柱銘等傾過吓，不過佢哋唔接受。只係政治一日都嫌長，未到最後一刻，仍會有變數。
