為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 10 月 01 日

華人民主書院教路 港學運抄足太陽花

台灣今年三月爆發太陽花學運,佔領立法院、衝擊行政院,令不少香港學運先鋒羨慕不已,一直希望香港亦可以發動一場港版太陽花學運,自己可以成為林飛帆、陳為廷呢類新政治明星。

為咗成事,學民思潮黃之鋒喺華人民主書院董事陶君行穿針引線下,今年六月走去台灣拜師學藝,向林飛帆取經,學習點樣發動一場有聲有色的佔領運動。據講,主人家熱情招待之外,更加傾囊相授,將太陽花學運由籌備、組織架構以及運作過程等經驗,詳細講解畀黃之鋒聽。

消息人士透露,黃之鋒同陳為廷私下亦好熟絡,舊年七一就係黃之鋒帶住陳為廷參加遊行,兩人不時保持聯絡。今次黃之鋒帶住學民喺添馬公園發動罷課集會,好多地方明顯抄足太陽花,例如場地布置同邀請學者講課等環節,似到十足十。

參考台灣學運經驗,要打持久戰一定要有充足資源,大會今次就一早預備好多物資,例如設立幾個手機充電站,確保參加者手機有足夠電量,可以隨時傳播新消息,手機叉電站正正係由太陽花學運創先河。

上周的罷課行動已有零星的衝擊行動,預示佔中必定大亂。(晉平安攝)

台灣太陽花學運,學生最初在各大學校園集合,最後再聯合佔領立法院。(路透社)

太陽花學運過程裏,學生組織有自己全程直播的網台,有自己的輿論媒體平台,可以任何時候向外發放新信息,學聯亦照辦煮碗,喺政總現場架設Wi-Fi無線上網,各義工可隨時上網更新facebook訊息,讓外界可第一時間了解最新罷課情况,仲有一啲social media可以即時現場做live直播,似足當日直播立法院佔領咁。

消息人士又透露,幕後好積極幫學生的華人民主書院,喺佔中籌備預演參與度亦好高,經常動員參加綵排外,今年六月又喺城大舉辦「港澳台社運發展研討會」,邀請農陣、勞陣呢兩個台灣出晒名衝鋒陷陣的工農組織來港,同學民、學聯仔聯合座談,亦係變相傳授緊台灣「搞革命」經驗。

學民、學聯過去幾個月密密受訓,所以今次組織分工明顯更趨成熟,例如成立二十四院校的聯合罷委會,罷委會下面又分糾察組,負責現場人流秩序,物資組負責音響、帳篷等物資。據講成班人要將好多器材由中大百萬大道運至政總都唔簡單。

現場布置妥當,又要成立節目組,安排唔同議題講座,成個流程其實幾浩大,如果冇太陽花學運班前輩教路,香港學聯、學民仔點可能咁神速上手。

黃之鋒(左)較早時到台灣取經,拜會林飛帆(左二)、華人民主書院董事會主席王丹(右二)、陳為廷(右)。

罷課行動籌備仔細,政總多處地方都設有手機「充電區」。(林崢攝)