為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 09 月 30 日

關慧玲

《東周刊》社長兼總編輯。

前線記者辛苦了

社會出大事的時候,大部分人後退,記者卻是勇往直前。剛過去的周末,好多記者因為採訪佔中,無得瞓事小,中胡椒噴霧和催淚彈的不計其數,卻依然走在最前。

本刊攝影組阿頭,死守喺政府總部對出,夾在大堆示威者和警察中間兩個多鐘頭,食正警察施放第一輪催淚彈的攻擊。佢話完全無心理準備,先係聽到嘭一聲好似開槍的聲音,再嗅到刺鼻氣味,眼睛隨之陣陣爆痛,狂標眼水,戴住口罩都頂唔順,成三分鐘失去視力,身旁有人遞水給他沖洗,過了幾分鐘才無咁痛。之前他手臂也中過幾下胡椒噴霧,皮膚通紅。

佢話催淚彈殺傷力有得估計,反而最危險是群眾用來擋胡椒噴霧的雨傘,由於跟警察對峙時,雨傘被來回搶奪,尖銳傘骨好易插傷眼睛,佢自己都被插傷了手臂,他眼見也有警察因此受傷。

資深攝影師偉,來回干諾道中拍攝,手上只有一條毛巾,市民向後避走催煙時,他就向前行,沒有風時催煙停留的時間很長,他掩住鼻子依然呼吸不暢,用口呼吸更大鑊,狂咳不止,不過他都理唔到咁多,喺迷漫煙霧中繼續拍攝。

香港世貿會議舉行期間韓農衝擊時仍未入行的D,第一次見識催淚彈威力,皆因個彈正正落在她身邊,她說發彈來得好突然,只見自己腳下突然落下一個熊熊火光的物體,繼而氣味攻入眼鼻,好似辣椒塗了上面般刺痛,她下意識用手護頭蹲下身,到能再睜開眼時,身邊所有人全都走開了。她本能拿出手機,想拍下催淚彈,卻發現手機記憶體爆滿了。

編輯M企喺天橋觀察警民對峙,以為無咁易中招,原來催煙一路向上飄,佢眼罩都戴唔切,佢見到無綫小花嘉欣BB被煙攻得雙眼通紅,而佢旁邊的攝影師,就狠狠中了一下胡椒噴霧,痛到面容扭曲。

綜合各前線行家遭遇,佢哋話催淚煙最初好有震懾效果,但通常五分鐘左右就散,不少人觀察到警察的Pattern,放彈前一定先戴上防毒面罩,於是大夥也就跟着戴眼罩口罩,避過一陣又一陣的攻擊;反而胡椒噴霧更毒辣,噴中真係紅腫兼劇痛,可以痛足一日。

大戰漫長,緊守中立的記者們,辛苦了。