為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 09 月 23 日

關慧玲

《東周刊》社長兼總編輯。

校長的增值故事

港專校長陳卓禧(手持吉他者)係前記者,總是愈忙愈精神。港專近期好多發展計劃,除了得到政府撥出新校舍擴展,又開辦首個自資的「社會發展研究(榮譽)社會科學學士課程」,今年十月開課。

跟陳校長參觀獲政府分配的馬鞍山前五邑工商總會馮平山夫人李穎璋學校校舍,佢哋獲馬會慈善信託基金贊助四千四百八十萬元,為新校園翻新及添置設備及推出服務學習計劃。新校舍預計二○一五年啟用,可與現有的馬鞍山校園打造成「雙子校園」。

陳卓禧興奮地話,校舍本來仲有其他競爭者,佢都擔心未必得,好在政府buy佢哋嘅擴展計劃。兩所校舍相距約三分鐘步程,中間隔住一個公園,可以給學生更多空間。新校舍佔地約七萬平方呎,設施包括剪接室、後期電視製作錄影廠、影視製作室。

陳卓禧由傳媒一頭栽進教育界,九七年當上港專校長,一做十多年。佢對持續教育感同身受,因為佢都係過來人。

陳卓禧喺公屋長大,父親做工廠,家裏沒有能力供他上大學。作為家中長子,也自覺有責任養家,所以中五畢業就出來工作,喺一間私中教中文。教育界後來開始大變動,津校大肆擴展,而他沒有教育文憑等資歷,不能轉去津校教,前路愈來愈窄。

當時他已經二十四歲,換了在今天有時打橫嚟講的社會,他大可以大聲抗議政府轉例打爛他飯碗,但他當年深思熟慮後,決定從頭再來為自己增值,以二十四歲「高齡」重考會考;日間繼續教書,放工返夜學進修。他笑說唸預科時,自己是班上年紀最大的學生,如果不是一擊即中就慘啦,那一年壓力認真大。幸好最後順利考入中大新聞系,八三年仲攞到星島嘅獎學金。

轉入教育界前,他曾在無綫,跟當時新聞及公共事務部大姐大June Tang(前新聞統籌專員鄧惠鈞)做專題,九一年做麗港城居民反對區內起精神病康復中心,見到居民令他感觸良多,皆因記者係旁觀者,可以改變的不多,他希望能做多些扶助弱勢社群嘅工作,至毅然轉去做成人教育的港專。

喺港專十幾年,教育界翻了幾番,佢走過不少高低潮,期間一直進修,○五年終於攞到英國愛爾蘭歐士達大學嘅榮譽博士學位。

陳卓禧呢條持續進修路,成為好多學生嘅人辦;一躍即進大學固然舒泰平坦,歷盡迂迴終於成功,又是另一番得着。

講番港專,呢間昔日教授工人技術培訓及初級文化嘅學校,因時制宜演變成今日本地最大規模的民辦專上院校,見證本地教育不斷蛻變,正如陳卓禧自己,變通是幫自己搵出路,唔變唔通等死?