今天返學開心嗎？

踏入九月，面書遭一眾莘莘學子首天上學的照片洗版。PN班、升K1、升小一，年紀愈細的，流露出來的笑容愈天真。相比起我家兩隻大牛龜，天天上學前那副睡眼惺忪不情不願的模樣，簡直覺得所謂的學習，其實是在摧毀他們的童真。

孩子每天放學回家，媽媽總會循例問問：今天返學開心嗎？問的求其答的更hea，最常得到的答案是：OK啦。咁即係點呢？即係OK囉。這種無意義的對話每天重複，我卻永遠不能了解他們在學校裏到底經歷了甚麼，令本來興致勃勃的上學生涯，變得愈來愈平淡無味。

偶然在網上看到一位外國媽咪，分享她如何令家中大小三個孩子，開口分享在校的喜怒哀樂。秘訣原來很簡單，就是不要再問：「今天返學開心嗎？」而是透過一些較具體，又或能引起他們興趣的話題去打開話盒子。把外國媽咪的經驗本地化，試試以下的問題，能否令閣下家中那位開金口。

一．今日有乜好笑嘢？

二．若有得揀，你會揀邊個坐响你隔籬？

三．有冇人响學校講粗口？

四．講一樣今日學嘅嘢畀我知。

五．今日最好（最悶╲最差╲最離奇……）嘅事係乜？

六．假若有外星人嚟咗你學校，你最想佢捉走邊個？

七．小息多數玩乜？同邊個玩得最多？

八．今日有冇人被老師罰？

九．全班邊個最搞笑？

十．如果你係老師，你會做啲乜？

對着較年長的孩子（譬如我家老大），以上的問題或會流於幼稚，以下這些同樣具體，相信會較貼身。

一．今日同邊個去威？

二．今日遇到最型、最得人驚、最搞笑、最慘嘅事係乜？

三．如果你係老師，會覺得邊班最好教，邊班最惡啃？

四．邊班最勤力？邊班上堂最hea？

五．你啲friends多數响邊班？你最鬼憎嗰幾個又喺邊班？

六．邊科最難捱？邊科最易過骨？

七．若果要响學校唱或彈首歌，你估多數同學會揀咩歌？

八．轉堂期間大家多數做乜？

九．邊個歌星╲明星╲樂隊……近日最多同學講╲鍾意？

十．你間學校最叻係乜？最渣又係乜？

親子溝通，從來不是易事，好多時候，爸媽都要像偵探般，閱讀孩子的的眉頭眼額，還需絞盡腦汁令他們說出心底話。以上幾招我試過了，未必招招有效，但答案至少較「OK啦」有趣得多。