為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 08 月 26 日

關慧玲

《東周刊》社長兼總編輯。

救狗又搞出公關災難

一隻唐狗引起一場熱論,香港大企業又上了一課。

香港愛貓狗人好多,這隻唐狗日前闖入港鐵上水站路軌,之後被列車輾斃。令人握腕的是,唐狗誤闖路軌後到處徘徊,好多乘客睇到,亦親眼望住職員如何「救」狗。睇近日流出的短片,狗仔見人猛擺尾巴表示友善。職員其實只需伸手一抱,狗隻便可救到,可惜最終是悲劇結局。

鮮血流一地的畫面太震撼,好多狗友話,早知自己去救,但限於港鐵附例未敢踏落路軌,大家憤怒,可能是在生死之間,有點被迫袖手旁觀,自己都說不過去。

說港鐵職員是兇手,要懲處,卻又說過了頭。公司沒有規定遇到動物要點處理,前線職員在有限時間、空間內,是抱走牠?趕牠離開路軌?還是報警?點樣為之正確?職員沒有指引,根據的只有自己當時的心態吧?或者有人覺得狗之嘛,有人又會諗,港鐵延誤會好大鑊,關乎公眾利益,誰敢自把自為?

有公關高人拆局,話撞死狗事件竟然比港鐵工程超支更吸引眼球,上足幾日報紙,連兩岸三地都轉載,其實唔少關節位都有甩轆,令件事發大。最慘係港鐵第一次新聞稿話上水職員搵過唔見隻狗,但現場市民目擊嘅唔係咁,第二日又承認上水站有職員發現隻狗,資訊前後不一,扣咗印象分。

呢位高人話,如今人人有手機,個個會拍片,顯然件事眾目睽睽,職員說了一個版本,是否就是全部?港鐵能否多方求證?是否可以先出一個較空泛的聲明,爭取時間再查一查?

翌日報紙鋪天蓋地話港鐵有意隱瞞,都唔係無得補救。高人話可以立即對外講,早前接收資料有誤,至於責任誰屬就要成立小組查下先;此外網上流傳話有人講過「隻狗唔走就要撞死佢」,高人話呢個係虐待動物行為,係犯法嘅,港鐵可以話會交警方去查,爭取多些時間自己內部定一定,了解清楚先。o依家嘅處理,就好似跟着輿論走。

Social Media多數較激,八萬個簽名就已形成一股氣場。港鐵認為要嚴陣應對,派出高層捱轟,做法卻又引起港鐵內部不滿。有港鐵前線中人明言,佢哋犯咗乜嘢要道歉先?港鐵管理層變得兩面都不討好。

港鐵作為香港最大型的鐵路運輸系統,有責任提供準時列車服務。易地而處,換了你是車上乘客,列車停駛幾小時,直至救到隻狗為止,是否大家也可以接受?到時會否有大批乘客抱怨,大鬧返唔到工,來不及去醫院見親人最後一面,諸如此類。不救,畀人鬧,要救嗎,則延誤難免,點做都畀人鬧到隻狗咁。

美國紐約地鐵去年也曾有兩隻小貓咪走進路軌,列車停駛個半鐘,之後恢復行車及叮囑車長留意貓咪蹤影,擾攘七小時才救到。日本大阪市某車站列車因狗隻闖入路軌而停駛,職員走下路軌將狗隻抱起走回月台,快速利落。

值得反思的是,香港這個社會,究意願意為動物付出多少?指引再多,不及人心改造咁有效。