為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 07 月 15 日

關慧玲

《東周刊》社長兼總編輯。

鄺保羅的啱聽與唔啱聽

身兼全國政協委員的聖公會大主教鄺保羅(見圖),日前在講道中話部分「七.一」佔中人士有羊群心態,認為有些事「不一定要出聲,無聲勝有聲」,言論引來不少激辯。

筆者好多朋友都係聖公會教徒,因為呢篇講道,令佢哋分成兩派拗一大餐,有認為鄺主教唔應該揶揄佔中人士,但也有不少人覺得鄺主教好勇敢,敢於為不太啱聽的論據發聲。朋友話,教會內對佔中都有不同聲音,有贊成有不贊成,香港社會不是容許多元的麼?天主教的陳日君公然撐佔中係一種聲音,亦唔代表所有天主教徒都贊成佔中。睇番鄺主教過往言論,其實佢去年聖誕文告已經擺明反對佔中,不過當時未有引起咁大迴響。

有資深聖公會中人話,教會內有建制派的聲音,也有較開明的看法,一直共容,不會因為道不同而互相敵對,今次算是比較例外,看來香港政爭升溫,連「屬靈」的教會也捲入風波。

不過,呢位資深聖公會中人再話,鄺主教拖耶穌落水,咁樣難免爭議不斷,因為《聖經》記載的耶穌形象,本身就有好多面;而不同福音書形容嘅耶穌性格有不同,例如「路加福音」就描繪耶穌成個俠士咁款,跟「約翰福音」講嘅形象非常不同。

筆者印象中,耶穌是改革家,敢於直斥那時代種種偽善,令羅馬政權恨之入骨,要除之而後快。甚至有野史記載,話因為耶穌有過人感染力,曾經有人想借佢號召萬民組結軍力,對抗殘暴政府。不過《聖經》記載他面對暴虐政權甚至連生命也奉上時,他沒有選擇擁兵自重以暴易暴,反而是默默接受命運,最後死在十字架上。

綜觀耶穌的人生,是發聲有時,沉默有時。在這方面,鄺保羅沒有錯,反對他的人也沒有錯,不過是各取所需。可能鄺主教最唔啱聽嘅,係話佔中者為何不帶菲傭去遊行,姑勿論佔中對錯,咁樣確有失牧者溫柔敦厚。

這個暑假香港真係好熱,簡直係火頭處處,朋友飯局不時因為不同政見而拗到火紅火綠,好似筆者上星期一個聚會,大家就為有無去「六二二」投票,變成口水大會,最後彼此笑說,下次要講明不談政治至得。

對香港社會氣氛非友即敵各走極端,情況似乎更上層樓,已去到競爭性發聲嘅地步,即係你大聲,我更大聲,以噪音互蓋,動不動就晒冷,爭奪眼球。

寫這篇文時,電視剛好播着今屆文憑試女狀元之一徐詠然的訪問,呢位小妮子話想讀政治,因為佢覺得目前狀態係大家都企得好硬,似乎無咗中間磨合嘅可能,佢想知道多啲,將來對社會有幫助。多些這類不盲從嘅年輕人,社會就不會無端端燒到咁滾。