為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2014 年 07 月 01 日

Too smart, sometimes cautious... 張寶華

二○○○年因為前國家主席江澤民一句「too simple,sometimes naive」,令當時被譽為「有線新聞之花」的張寶華聲名大噪,成為了新聞界紅人。十四年後的今天,她已是寰亞傳媒集團企業市場推廣部的高級副總裁,過去一年曾改名「張洺華」。「我個姓名學朋友話『寶華』個名好硬,就改咗佢,但係改咗之後都冇人嗌,所以我都係改番『張寶華』。」最近更實現了夢想,推出她首本小說著作《失眠書店》。

「呢本書係奇幻愛情小說,寫小說對我嚟講,並唔係理想,而係個夢想!因為夢想係something may not happeno架嘛,o依家可以夢想成真,我真係好興奮o架!」

然而奇幻+愛情,總是感覺跟她向來的形象有點格格不入。「奇幻呢,其實我由細到大都好鍾意啲supernatural嘢,我細個嘅志願係做太空人,或者係天文學家,我小學、初中嗰陣書櫃最多嘅書,都係天文學嘅嘢。」

至於愛情呢?難道又擁有過豐富的愛情經驗?「呢本小說裏面,有好多情感,都係我真實經歷過嘅感受。但其實連埋初戀,我只係拍過三次拖,中間嗰啲無無聊聊嘅,就唔count啦。我係個好難去鍾意人嘅人,o依家我仍然有好多人追,但冇拍拖,個人大咗,我對感情嘅嘢更加謹慎,我唔係驚嘥時間,而係驚浪費感情。」

縱使她外形嬌滴滴,看來是典型的小鳥依人,但對於愛情,她實情是「too smart,sometimes cautious(謹慎)」,「同我嘅樣真係好嚴重地相反o架!」

正在追求她的男士們,請務必注意。

睬佢都傻

在張寶華有關愛情的經驗中,叫她最深刻的,是曾經有三位男士向她求過婚。第一次,是她十九歲時,那男士是父親家族的世交朋友。

如果以我o依家呢個年紀去睇,呢位男士絕對係個才俊,唔應該放過嘅!佢係個中國委派去聯合國做嘢的人,嗰陣只係三十三、四歲左右,印象中個樣仲係唔差。

我同屋企人同佢食過一次飯,佢只係見過我嗰一次面,就同我阿媽講:「我好鍾意Sharon(張的英文名),我想同佢結婚。」跟住我阿媽好冷靜咁同佢講:「好呀!你自己同佢講呀,佢肯嘅,咪結婚囉!」

我阿媽就係個咁嘅人,佢從來都唔會認為,你係個乜嘢名人、才俊、well off嘅人,我個女就要同你交往。而且佢亦都好清楚,嗰陣嘅我根本冇可能會同呢個人結婚!

喂!傻嘅咩?一來、我嗰陣得嗰十九歲,真係好simple and naive,對我嚟講,三十幾歲喎,咁老!唔係呀嘛?二來、我嗰陣先啱啱準備入大學,我個世界先至話啱啱開始,咁就同佢結婚?講笑咩?梗係冇可能啦!梗係睬佢都傻啦,拜拜啦!

張寶華首次創作的奇幻愛情小說《失眠書店》,下月六日將會舉行座談會,詳情可到她的facebook fan page(張寶華Sharon) 睇睇。

就讀筲箕灣聖馬可中學的她,是校內風頭躉,成績名列前茅外,亦深受男同學歡迎。

愈嚟愈遠

九十年代初,她入讀中大新聞及傳播學系,認識了她初戀後的第一個男朋友,兩人一牽手,便拍足十年拖。

佢大我七、八年,係個好laid-back(懶散)嘅人。我屋企管教好嚴,我又住香港,好少去九龍,但呢個人嗰陣會成日帶我周圍去,有時會帶我去九龍食飯,有時又會同我去街去夜啲……對嗰陣時腦囟都未生埋嘅我嚟講,呢啲嘢都好得意、好開心,但亦都係好temporary嘅事。因為到我大個咗嘅時候,有邊度我自己去唔到呀?唔好話去九龍食飯呀,去新界我都得,去埋屯門我都仲得呀!

然後,慢慢我就發覺我需要嘅,係一啲要大家配合到嘅價值觀。但係我哋性格好唔同,好似嚟自兩個星球嘅人咁,所有嘢都好大分歧,例如我如果determine(決定)咗一啲嘢,就要喺有限期裏面搞得到,唔係無限期咁去搞喎——淨係呢樣嘢,我同佢已經好多conflict(磨擦)。

到我哋拍拖拍到第十年嗰陣(離開有線前),佢都向我求過婚,但係嗰個moment,我已經覺得我哋兩個好唔夾,冇辦法carry forward落去,為咗以後嘅日子大家好過啲,惟有放手。可唔可惜呢?可惜o架。

在有線新聞工作期間,主力兩岸政治新聞,「一年有八、九個月唔喺香港,好churk!」圖為她(右四)與一眾行家跟前國家副主席曾慶紅(左三)合照。

自我中心

○五年,她離開有線新聞,到英國牛津大學進修新聞。就在彼邦,她認識了她的第三任男友,甚至更在美國訂了婚。

佢係個喺英國讀書嘅美國人。嗰陣我係攞獎學金去讀書,佢係屋企人供嘅,所以我哋喺英國嗰陣,大家都冇時間、冇金錢壓力,乜都冇乜所謂,我同佢識咗冇耐,佢就已經向我求婚,然後我仲跟佢返去美國紐約度訂埋婚,畢咗業之後,佢就因為我,嚟埋香港。

但係返到嚟香港,我要面對好多嘢,加上嗰陣我細佬身體出現咗好大嘅問題,所有嘢都變得有壓力,連佢都覺得我成個人變晒,但其實我都冇變過。

至於我哋分手嘅主要原因,係佢永遠都係「I乜乜」、「I物物」,乜都係「I」行先,我已經夠自我,但佢係我一百次方!嗰道氣太勁!我頂唔順!

佢好重視聖誕節,佢同我講,以後聖誕一年喺香港過、一年喺美國過。同佢返嚟香港第一年聖誕,我細佬喺醫院,我哋就喺香港過;第二年,我細佬出咗院第一個聖誕,佢竟然好堅持要我同佢返美國同佢屋企人過,喂!唔得囉!你個人咁樣,都唔使諗啦!係咪呀?係咁先啦你!我就即時趕咗佢走!其實我哋嗰陣本來諗住返嚟香港結埋婚o架,但結果就咁break咗,所以佢好嬲o架!

跑新聞令她(右三)經常接觸到不少達官貴人,例如政壇老大哥李鵬飛(左三)。

曾推出過數本著作,其中《走看東.西》的序,更找來前港督彭定康撰寫。

唔係呀嘛

張寶華是公認的靚女,她承認,從小到大,身邊一直也不乏追求者,當中既有單身的和已婚的,亦有不少名流高官。

我由細到大都好多人追,甚至由大學畢業開始,到o依家都冇停過有名人追我。

我做新聞嗰陣,有次我喺新加坡,有個我做訪問時認識、見過兩次面嘅被訪者打畀我,問我第二晚得唔得閒,我以為佢有嘢搵我傾,點知原來唔係,佢只係特登飛嚟同我食餐飯,第二朝一早就走咗!

跟住有個喺馬會啲會員,有日我開開吓工,佢打嚟問我:「你下晝有冇時間呀?同你去騎馬呀!」喂!傻嘅咩?我開緊工o架嘛!你係大老闆,你就唔使做啫,我哋呢啲小職員,係要做嘢o架嘛,你喺我開工嘅時候叫我去騎馬,我覺得好唔appropriate(適當)囉!對我嚟講,我工作嘅時候,公司嘅利益大過天,但係你叫我去做一啲完全違背我覺得最重要嘅嘢,唔係呀嘛?同埋呢,我係個素食者,我係唔會騎落隻馬度囉!我好唔鍾意囉!根本都唔係我嘅style!

不過呢,我哋每個人都係個體,你要做乜,我控制唔到,但我要點feedback、要點做,我就完全控制到囉!我係個好難鍾意人嘅人,唔係我鍾意嘅,我係唔會畀多餘嘅fantasy佢哋,好清晰!

對我嚟講,愛係成全,如果我有啲嘢解決唔到,你幫到我,或者教到我,甚至乎會因為要成全我而有所犧牲,我覺得呢啲先叫「愛」囉!

各位男士收到冇?

張母(右二)是張寶華(左二)從小到大的啟蒙者,性格也受她影響至深。

Like mother, like daughter

是的,張寶華的性格就是跟她的外形幾乎極端地相反。

她成長於一個她形容為「普通中產」的家庭,下有一個比她年輕三歲的弟弟,父母都是典型的上海人,而她自己的性格,則大部分受媽咪影響。

我爸爸做印刷生意,o依家已經退咗休;我媽咪係個家庭主婦,不過就最叻買樓,佢鍾意喺香港、上海同北京買物業,所以我哋屋企都可以話係生活無憂嘅。

我嘅父母成日覺得女係要貴養,仔就可以cheap養,所以我細個乜都係新嘢,學乜嘢都係有專人教。但我細佬呢,就乜都用我啲舊嘢,學乜都係跟大圍學。但係我又冇畀佢哋搞到有公主病喎,因為佢哋好嚴,除咗緊張我哋讀書,仲好緊張禮貌,見到人唔叫,真係會畀佢哋打鑊甘o架!

如果話我性格硬朗,其實我都只係我媽咪嘅六十六個percent咋!佢真係好堅,是非黑白好分明,有時佢知道有啲嘢我好驚、好怯,佢就會話:「有乜嘢好驚呀?」佢教我哋做任何嘢、講任何嘢,都唔可以違背自己,而呢樣嘢亦令到我一直以嚟嘅價值觀都好清晰,冇嘢再要我bother(懊惱)!

父親是典型的上海人,每天必會親自下廚給家人吃。