為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 05 月 29 日

建制派發功 搞fb專頁吸潮青

大家平時上fb都鍾意like吓唔同嘅page,但大家畀like之前,有冇諗過個page究竟係咩背景呢?近期fb出現唔少地區專頁,例如「葵青友」、「沙田友」、「觀塘友」等等,唔少網友都覺得幾盞鬼,紛紛對號入座畀like,不過本刊打聽之下,就發現呢堆專頁並唔簡單。

專頁多人like,係因為佢哋畀咗錢賣廣告(Sponsored Page),會自動置頂,多人見到自然多人like,現時部分人口密集嘅區如沙田、觀塘等專頁,已經儲到二萬至三萬like。專頁要人打理之餘又要畀廣告錢,點都需要資金,記者發現幕後負責人竟然同基本法委員會委員劉廼強有關。

專頁賣咗廣告效果唔差,截至周一,「觀塘友」已有三萬多人like。

消息指,專頁負責人之一叫陳志豪(Victor Chan),佢係香港青年時事評論員協會副主席,個會由建制派新生代組成,定時發表文章月旦時事,儲吓名聲兼谷吓曝光率,成員包括青年民建聯主席周浩鼎、自由黨青年團主席李梓敬、同新民黨青委會主席甘文鋒。消息亦指陳替由劉廼強(下圖)話事嘅「大中華青年在線」搞研究同做宣傳。

記者打畀Victor查詢,佢起初十分友善,不過愈答愈緊張,一時話要飲啖水先,一時又話入(車立)要收線,不過佢最終承認係佢統籌專頁,至於跟劉廼強嘅事佢就一概唔答。記者亦有致電劉廼強,不過佢至截稿前都冇回覆。

有建制派地區人士分析,咪睇小地區專頁講吓區內有咩玩好似好無聊,其實喺輿論戰中有戰略地位,「如果硬銷政治立場一定趕客,大眾化話題容易儲like,到重要時刻,就會成為一個好好嘅鼓動民意工具,你睇葉劉(新民黨主席)平時喺fb講吓英文講吓睇戲,儲咗好多like,有政治議題時,就可以好有效散播意見。」下次大家畀like前,不妨留意吓個page係咩來頭!