為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2014 年 05 月 13 日

幸福號黃包車 梁詠琪

訪問這天,梁詠琪最常用的三個字,不是她要宣傳的電影《香港仔》,是「我老公……」。看見圖中的黃包車,第一句是:「我一定要帶我老公嚟呀,佢一定好開心啫!」接着已坐上道具車,並不像年屆三十八的人妻,比她走玉女路線時期,更少女。我多口,問她可有坐過真的,人妻已輕輕接上:「有!好耐之前同我初戀男朋友坐過。嘩!好耐嘞!」零芥蒂無避忌。無避忌的,還有以下對白:「喺戲入面,我係巨胸model,我問我老公鍾意我定係戲入面嘅我,佢話只要係我就鍾意。哈哈!」雖然黃包車極富香港特色,但梁詠琪專屬的一架,已有指定西班牙車伕Sergio,乘客坐得安心、開心。請看圖,不解釋。

豁出去

誠如梁詠琪所說,她在電影中的角色,是一名巨胸模特兒,跟現實的她一樣已婚,有個愛她的丈夫(古天樂飾演);不同的是,戲中的她已有個九歲女兒。但本刊乃絕對商業的娛樂雜誌,着眼點必定為巨胸及與古天樂的「肉搏」場面。

幸福的人妻,倒解說得專業:「係,戲入面我係要幫古仔口交,但係只係意識形態啫,我覺得OK喎。我老公同我一齊睇,佢睇咗都話:『that's good!』,咁切合番劇情,我覺得冇問題。

「好似要我着t-shirt加一條內褲,咁我有時喺屋企都會咁着,舒服吖嘛!就係咁着先夠寫實。」

梁詠琪不諱言,她的事業路是「逆走」的。「以前我會好介意人哋點諗、點睇,我諗呢個尺度,比着以前嘅我係唔會肯嘅。不過o依家我會覺得,演員係要豁出去嘅,愈唔敢或者唔肯,根本做唔到。

「仲有個巨胸,我有問過導演唔用特技化妝得唔得,佢堅持要用,話要我明白巨胸嘅負擔。哈哈!原來佢啱喎,我要化咗個妝,先明白巨胸可能會腰骨痛o架。」

市場調查(即本人細問周邊男士獲得結果)顯示,一般男性對巨胸也多一份遐思,惟Sergio的西班牙狂牛品味,答案為「否」。「我老公話,我變咗巨胸就已經唔係我,佢鍾意最原本嘅我喎。」

巨胸GiGi,大概只有戲中才可見。

在《香港仔》中跟古天樂的親熱戲,Sergio稱good!

我老公話,我變咗巨胸就已經唔係我,佢鍾意最原本嘅我喎。

未能忘記遇上

已婚兩年的人妻,享受成為「西班牙新抱」的感覺、事例:在訪問期間,因場地關係需要乘電梯上落,即找話題之時,梁詠琪解說她所穿的高踭鞋,為她親自設計的special。「我鍾意簡單啲,不過加少少西班牙元素,呢啲ruffles(手指設計)就係嘞!」

設計加入狂牛元素,全因二○一一年三月,梁詠琪的一趟西班牙之旅。「我係backpacker咁去西班牙,我好記得我喺巴塞隆拿第一次見我老公嗰晚,我着到全身黑色、連埋對黑色boots,好似secu咁,又冇化妝。佢就行過嚟話要請我飲嘢,媽咪教我喺出面唔好同陌生人飲酒,所以我同我老公講,我要飲可樂。

「後來我老公同我講,其實嗰時佢喺好遠已經望到我,想識我,哈哈!」

只是半年,雙方也認為「You are my destiny」,到同年十月便決定共諧連理。在梁詠琪眼中,Sergio是體貼的。「我老公同我講:『我嚟你嘅世界,係要令你開心,生活得更好、更舒服,而唔係做你嘅絆腳石,總之你開心,我就開心。』呢句說話令我好感動,佢嘅屋企,即係我老爺奶奶教得佢好好。」

一一年三月相識,十月結婚,至今兩年,幸福依然。

婚後Sergio為愛妻移居香港,一對新人落機即被傳媒包圍。

珍饈百味

說起丈夫,梁詠琪臉上多了十車蜜糖是常識吧!好享受的豈止生活舒服了那麼簡單?「佢係食品研究嘅專家,一嚟佢做呢行,二嚟佢煮嘢食都好叻。有時我哋請朋友嚟屋企食飯,都係佢負責煮,tapas、西班牙海鮮飯,佢都好叻,所以大廚留番畀我老公,我做二廚幫手切吓洋葱就OK。」

Sergio負責了綁住另一半的胃,梁詠琪樂得「清閒」,以為她會專心造人之際……「之前肩周炎,照埋X光先知骨都歪咗,脊椎、尾龍骨同盆骨都歪。o依家要stop(造人)之外,每個禮拜仲要做三次針灸同物理治療。

「我平時鍾意側瞓,原來咁會令腰骨易變歪,我老公o依家晚晚都提我,見我打側瞓就推一推我,提我要改睡姿。」

一四年三月,梁詠琪肩周炎求醫,被誤傳有喜。

夫妻拍拖節目是看演唱會,包括三月尾舉行的Bruno Mars。

好煩呀你

一中一西,梁詠琪香閨是位於港島聯合國,Sergio晚上要提提愛妻正確睡姿,平日的白天則一早要驅車往元朗上班,港燦井底蛙如我嫌遠嫌辛苦之時,人妻即顯示對丈夫瞭如指掌的「上風」。「唔係吖,四十五分鐘啫。佢之前喺西班牙返工要成兩個鐘,o依家近好多,有時仲可以接埋我收工去食飯添!」

在「聯合國」,梁詠琪表示官方語言為英語,不過:「有一次我同佢講啲嘢,講咗幾句之嘛,我老公就講:『好煩呀你!』呢句說話係我成日喺屋企對住隻狗講,佢又學咗,哈哈!」

除了「好煩呀你」,最近Sergio的常用廣東話,是「好痛!」。「我老公陪我去做針灸,聽到我講,我見到佢喊個樣仲好似痛過我咁。」

年初的農曆年,梁詠琪跟老公與家人的全家福,溫情洋溢。

六呎高又待我好

梁詠琪無名指上的,是如假包換的婚戒。

「開工拍戲我一定唔戴,屋企有個保險箱,我就放喺入面,我好易唔見嘢,唔見咗都唔知點算!但係做訪問啫,一定要戴上手,唔係就冇咗意義。」

看過起碼佔四版篇幅的Sergio「冧老婆事件簿」,下題意思?持續不解釋。

五呎九吋高的「西班牙家嫂」,穿了三吋高跟鞋仍比Sergio嬌小。