為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 04 月 11 日

「林捲風」勁吹 女友驚青宣示主權

台灣反服貿學運連搞幾個星期,將學生領袖林飛帆人氣谷到天咁高,可以講直逼大明星。

咁講法絕冇誇張,事關林飛帆唔止係新民主鬥士,更變成潮流icon,網上粉絲更幫佢改名叫「帆神」。佢連日身穿嘅綠色大衣,有人索性叫佢做「非凡衣」,大褸喺台灣早就賣斷市,香港都冇晒貨,不過有網友話日本好似仲有存貨,如果唔嫌機票貴,就趕去「淘寶」啦。

件褸爆紅之外,林飛帆佩戴嘅眼鏡框一樣熱賣。有台灣商家借機抽水,大賣廣告話:「眼鏡中只有正義!」不過就煞有介事講明「鏡框不包鏡片及林飛帆本人」,認真抵死。

林飛帆唔止人紅,佢所着嘅大褸亦成為潮物,喺台灣賣到斷市。

台妺愛睇靚仔,林飛帆呢個「帥哥」冧死唔少女粉絲。好多台灣少女覺得林飛帆嗌咪時激昂得來帶幾分俊俏,而被封為「台灣情色女教主」嘅「雪碧」,近日就喺網上載最新MV〈我愛林飛帆〉。

首歌喺立法院外取景,又配上林飛帆嘅新聞畫面,歌詞更提到「女孩們應該佔領他的心」,公然示愛。截至周日,MV已有十二萬人睇過,不過唔少網友就批評「歌詞無腦」、「博出位」等。「雪碧」回應話網友咁講嘢令佢受到打擊,但佢會虛心接受批評。

由於林飛帆引來唔少狂蜂浪蝶,搞到拍拖四年的正印女友林雅萍要大反擊,自己製作超甜蜜短片喺網上播放,仲透露想和帆神結婚,替他生個龍寶寶,宣示「主權」意味相當濃厚。

唔止女友自製甜蜜短片宣示主權,更有艷女主動獻媚,林飛帆可謂艷福不淺。

林飛帆一炮而紅,唔少人睇好他的政治前途,有評論指,以目前林飛帆咁高人氣,參選立委好大機會贏,有台灣媒體甚至叫佢二○一六年選總統,雲林縣長蘇治芬更話,應該由林與中國簽《服貿協議》。不過台灣法例規定,選總統必須年滿四十,對只有廿六歲嘅林飛帆而言,似乎仲遠咗啲。