為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 04 月 10 日

欲邀「黑島青」來港 學聯七一謀佔立法會

醞釀年幾但一直無厘聲氣嘅「佔領中環」近月忽然開快車,既成立行動組和籌備法律隊、醫療隊,上月底又搞咗佔中第一場非暴力抗爭訓練。雖然參與人數不及預期,不過五月六日仍會舉行第三次商討日,而六月廿二日就同港大民研合作,舉行首輪全民電子公投,畀市民揀普選方案。

佔中步伐雖然行快咗,不過泛民有人睇住台灣學運搞到㷫烚烚,也蠢蠢欲動。學聯最近講明希望今年七一就佔中,擺明挾戴耀廷快啲去馬。本刊獲悉,本周日班大學生挾咗戴耀廷開內部會議,提出加快佔中要求,戴耀廷回應依然溫吞,重申要照顧唔同民間團體睇法,似乎對七一佔中嘅建議仍然有保留。

學聯上月底開記招,倡議今年七一就佔中,有人更建議搵台灣反服貿學生教路佔領立法會,將來金鐘議事堂唔知會否亂到好似台灣立法院咁(下圖)。

據講學聯班學生十分失望,有消息人士向本刊透露,學聯極有可能搶旗話事,七一自行發動佔中、甚至佔領立法會。事實上佢哋近期同學民思潮、進步教師同盟等激進團體行得好埋,上月尾成立咗一檔「公民直接提名必不可少聯盟」,密密傾緊連串行動,其中學聯同學民下星期會合作提出一套「雙軌方案」:公民提名以及三十五名立法會直選議員提名特首。

學聯覺得要提早佔中,係受到近期台灣反服貿「大陽花學運」啟發,「台灣人唔會等服貿過咗先行出嚟,係之前就畀壓力政府。我哋要攞番主導權,在對方打我哋前,先做嘢警告對方唔好亂嚟!」消息人士話,考慮佔領立法會,最主要係「六二二」公投之後,佢哋會有民意喺手,「最近無論政府定人大政協,都開始放話將空間愈收愈細,所以我哋對政府方案冇任何期望。如果政府唔理公投意見,唔排除發動罷課、佔領立會等行動。」

戴耀廷周日見過班學生,不過未有清楚表明是否支持七一佔中。

消息人士又話,台灣學運領袖林飛帆搞佔領立法院行動咁成功,內部有人提議請佢來港傳授經驗,就算佢唔得閒過來,亦可以請「黑色島國青年陣線」其他悍將嚟,仲話香港始終係公民抗命初哥,有台灣呢班師兄教路,一定有得着。不過,「黑島青」之前突襲行政院,呢類野貓式做法,場面隨時大失控,台灣本土都有好多民眾反感,佔中要搵佢哋教路,要小心為上。