為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 04 月 15 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

樂力劇場

藝術可以多面睇,舞台劇係其中一種,所以今次「Paco巨星飯堂」,就特別邀請到香港話劇團藝術總監陳敢權(Anthony),聯同劇團新劇季嘅3位特邀演員:余安安、劉雅麗(Alice)同羅敏莊(MiMi),細訴舞台劇之樂!

我帶4位貴賓去到位於觀塘如心艾朗酒店嘅「forte」,一嘗集合各國特色嘅料理,就好似劇團新一季嘅劇種一樣,各適其適,令人目不暇給。

我帶Alice、安安姐同MiMi(左至右)去到「forte」,一邊品嘗各國特色菜,一邊暢談舞台劇。

與時並進

Anthony喺08年開始出任香港話劇團藝術總監,今年踏入第6個年頭,加上佢有廿多年嘅戲劇教育經驗,所以每年4月,即係新劇季嘅開始,佢同其他成員都有令劇迷期待嘅新作面世。2014至2015年嘅劇季,Anthony仲邀請到安安姐、Alice同MiMi分別為其中3個舞台劇擔綱,實在係舞台劇迷之福。

「今個劇季我哋有15個舞台劇,一共有17場演出。每一年我哋都有邀請唔同嘅演員參與演出,無論係佢哋定係觀眾,都好享受整個過程。」

Anthony投身戲劇界50載,o依家仍然不斷尋找合適香港嘅題材。

舞台劇比電視劇、電影更強之處,在於演員同觀眾之間嘅互動性,係即時而強烈嘅。相信呢點,舞台劇演員出身嘅實力派Alice,比我更加清楚。「完全正確!而且有唔少演員,都好享受謝幕嘅時候,接受觀眾熱烈嘅掌聲、歡呼聲。我05年同梁家輝合作做《新傾城之戀》,謝幕嘅時候觀眾嘅反應好好,掌聲一直冇停過,家輝就一臉滿足,到我喺側邊拉佢,同佢講要返入後台,佢都仲未捨得走。」

哈哈哈!家輝嘅反應,絕對無可厚非,經過辛苦嘅排練,到正式演出,謝幕一剎那又點會令演員唔期待?o依家Alice已開始為佢10月公演嘅新劇《感冒誌》作準備,絕不欺場。「呢個劇係一個現代化嘅劇,改編香港嘅年輕小說家韓麗珠嘅作品。我睇劇本嗰陣,畀佢嘅科幻味吸引,科幻在於故事嘅感冒,其實係孤獨,即係孤獨係一種病毒,引伸到有出租家人共處一室。

「驟眼睇好似好匪夷所思,但其實每個人都有孤獨嘅時候,我覺得呢個故事會令人有所體會。」

海鮮意大利飯配大蝦、帶子伴番茄汁($150),選用番茄汁更凸顯海鮮獨有味道。

巴西利卡塔海鮮湯($98),以蟹、魚骨同龍蝦製作湯底,係熬製3小時嘅心血結晶。

特級活造日本四季玄海刺身合盛(上圖、$398)及特級活造日本四季玄海壽司合盛(下圖、$298),都係由廚師精心挑選當日新鮮刺身炮製,鮮味!

復刻經典

相對Alice演出嘅新編舞台劇,MiMi孭飛嘅《俏紅娘》,係經典復刻。「呢個劇係改編自芭芭拉史翠珊(Barbra Streisand)喺69年演出嘅同名作品《Hello, Dolly》,係一個音樂劇。雖然今次唔係我第一次演出音樂劇,但係因為珠玉在前,芭芭拉史翠珊係殿堂級人馬,所以我要加倍落力排練。o依家都仲可以咁講嘢,我諗1月公演前幾個月,我就要咁講嘢(放輕聲線)養聲。」

不論係喺舞台身經百戰嘅Alice(左),定係跨媒體演出嘅安安姐(中),都表示享受演出舞台劇,因為可以得到觀眾嘅即時反應,滿足感特別大。

安安姐參與《最後作孽》演出,係劇團2014-2015劇季嘅壓軸作,將於明年3月公演。

MiMi演出嘅劇目,係由Anthony一手繙譯同執導,除此之外,仲有另一個文化意義,「今次係我哋同MiMi第一次合作,而劇目就喺89年,香港文化中心開幕嘅慶祝節目,今年係文化中心開幕25周年,代表咗一個好劇本,係冇時間限制。」

好劇一種係不受時代規限,一種係題材夠貼身,令人容易產生共鳴,好似安安姐主演嘅壓軸劇目《最後作孽》咁,就有一種寫實感。「今次係我第二次做舞台劇,兩年前做《遍地芳菲》要做村姑,今次個角色就現代化好多,而且仲係怪獸家長,只係滿足個仔嘅物質需要,所以產生咗好多問題。

「角色同真實嘅我好唔同,我着重同啲女嘅溝通,物質反而係其次。至於準備工夫,我同MiMi差唔多,開始排練就要養聲,唔可以畀自己病,所以我必定會早睡早起,謝絕應酬聚會,最重要係滴酒不沾!」

Alice嘅《感冒誌》,將孤獨變成「感冒」,寓意深長。

MiMi擔綱嘅《俏紅娘》(上圖),係以芭芭拉史翠珊嘅同名經典作為藍本(下圖),音樂劇亦令人期待。

最強大腦

哈哈哈!聽到安安姐咁講,我就立即向嘉賓們推介,真正蘇格蘭式開聲秘方,就係以暖水溝少許威士忌,份量可以係8:1,有輕微感冒仲可以加一片檸檬,一定藥到病除!

眾嘉賓都即時測試,一致畀like!其實我都係以Anthony推廣粵語舞台劇嘅努力,推廣呢個簡易開聲秘方啫。「其實一個好劇本,用唔同語言演出都有吸引力。香港嘅話劇,追求真實、自然,講究場面嘅可信性。

Anthony、Alice、安安姐同MiMi(左至右)大力推動香港舞台劇文化,值得我乾杯致敬!

MiMi為咗音樂劇嘅演出,將會養聲 。

「o依家有好多劇目,都有喺國內演出,廣東話配上字幕輔助。不過,內地觀眾同香港觀眾對演員嘅反應,即係對部劇嘅情節、對白嘅反應,大致上係冇分別,兩地觀眾嘅投入感,唔會因為語言唔同而有分別。」

藝術本應無語言,文化之分,Anthony呢位「大腦」早已深明此道,「多年嚟我都一直搵適合香港社會題材嘅劇本,有人話香港變成普通話城市係遲早嘅事,我唔想有呢一日嘅來臨。好難想像嶺南文化嘅傳承,要靠其他方言,粵語文化係好值得保留。」

我絕對贊同!不論係舞台劇抑或音樂,粵語都係舉足輕重,亦有其代表性!

橙魚柳配法式忌廉汁伴時蔬($188),魚香滑,亦跟配料搭配!

咖啡碎粒煎焗澳洲羊架($350),先將澳洲羊架煎至3成熟,配上芥末及illy咖啡碎粒再焗,令菜式更多層次。

forte

地址:觀塘創業街38號如心艾朗酒店2樓
電話:3968 8222