為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 娛樂追擊 2014 年 04 月 11 日

馬神仔勁定華倩仔醒

香港唔少星二代都好叻仔、好叻女,好似馬德鐘個仔馬在驤咁,能文能武,除咗玩小提琴同管弦樂之外,仲係一名游泳健將,啱啱代表學校去上海參加亞洲區法國國際學校游泳錦標賽,攞咗七金成績。「飛魚王子」高大健碩,o依家一米八五高過老竇,唔怪得畀網民封佢為「新馬神」啦!

「新馬神」今年十五歲,咁啱得咁蹺同曾華倩嘅囝囝林浩賢(Martin)同齡,而大家又係一樣游水咁叻,咁究竟「新馬神」勁,定華倩囝囝較醒呢?

東姑喺好奇之下,搵咗佢哋兩個喺香港比賽對壘過嘅成績做比較,答案係「新馬神」連番輸晒畀華倩仔。啱啱三月中嘅香港泳總比賽,Martin分別喺自由式100米、200米同埋400米都游贏咗「新馬神」,就以自由式100米為例,Martin游出52.45成績攞到個「梗頸四」,但「新馬神」就只係游56.01秒,排名二十一,不入十五至十七歲組別賽嘅二十大之內。

「新馬神」喺法國國際學校威到盡,但一碰埋讀香港傳統名校喇沙書院嘅Martin呢啲「喇沙仔」度,就未必可以贏開巷咁一面倒。不過,學正牌「馬神」馬德鐘話齋,個仔仲細,應該可以有更多進步空間嘅,又唔係爭一日之長短,來日方長啦!

馬德鐘乖仔馬在驤喺上海參加亞洲區法國學校錦標賽,威盡全場,贏晒啲鬼仔。

曾華倩嘅囝囝林浩賢(Martin)一樣係游泳健將,仲與「新馬神」同場較量過添。

馬神高大威猛出晒名,o依家個仔一米八五仲高過佢,兩父子搭晒膊頭好有兄弟feel。

華倩同天下阿媽一樣望子成龍,廿四孝阿媽嘅佢,就成日陪太子讀書,不時陪囝囝四圍比賽同練水。