為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2014 年 04 月 01 日

田充題 田蕊妮

選擇題:

有何課題令人生充實、圓滿?

A. 家庭 B. 愛情 C. 健康 D. 財富 E. 事業

老土的題目,但也不要太貪心的自行加上「F.以上皆是」。這個道理,田蕊妮最懂。

喝着齋啡,她淡淡的道:「有段時間我好迷失,係有錢,阿澤(杜汶澤)好紅。我日日打牌、約朋友high tea,跟住已經唔知做乜好,好空洞。」

那段時間,是○五年二人新婚前後一、兩年,九年下來,田蕊妮由「杜太太」成了視后,最近還一圓心願,出大碟《You Are My Man》,當歌手。

「我當係得一次機會去做,都唔知有冇下一次,咩都要最好!」最好的,還是說到她的「man」阿澤親自操刀為她拍唱片造型照,據杜先生於訪問同日所說:「係我先知我老婆咩角度最靚!唔係我影點得?」

對於杜氏伉儷,對方就是二人的「最好的」,田蕊妮不諱言:「係我老公令我睇到世界唔同嘅一面,順境、逆境、負面嘅都好,咁先令我嘅人生更加充實。」

這個道理,你懂的。

就這麼簡單

訪問田蕊妮,一定要問杜汶澤是常識吧?但其實不用問,她也會娓娓道來,就如這次她出碟,機緣就是來自杜先生。「有一段時間,我好鍾意黃小琥嘅〈沒那麼簡單〉,每次化妝都不期然哼呢首歌,老公覺得幾好睇,於是就拍低放上YouTube。」

杜汶澤的一次無心插柳,造就了愛妻的夢想,田蕊妮充滿喜悅的續說:「之後咁好彩畀Paco(黃柏高)睇到,佢仲完全唔知我係唱歌出身,又話幫我出碟。我梗係開心啦!之後Paco問我想造新歌定翻唱其他嘅歌,我諗咗一陣,就揀翻唱歌。」

說罷,田蕊妮喝一口齋啡,以為她等待我下一個提問,她再說:「揀翻唱歌,因為我覺得啲監製搵到一首好歌、一首好詞,都會留畀容祖兒、千嬅或者Fiona(薛凱琪),點會留畀田蕊妮吖?至少我係監製嘅話,我會咁做囉!所以o依家環保啲,仲好。」

這段田蕊妮清唱〈沒那麼簡單〉的短片(上圖),YouTube點擊率超過八十五萬,其中一個網友,就是為她出碟的Paco(下圖)。

圓夢樂

說着說着,田蕊妮繼續連珠炮發:「o依家Paco仲話幫我出埋黑膠碟,保留原聲。我噚日喺Hifi德(太極成員劉賢德)度聽,嘩!真係好似有座鋼琴擺喺我面前咁!我老公話會買番個唱盤喺屋企……」

訪問當日,杜汶澤在另一場合告訴我故事的延續:「Hifi德真係吖!我老婆去佢度聽完,又話咩身歷其境咁,即係要我換晒屋企套Hifi啫,佢一路講我一路話:『得啦!我知啦!沉迷Hifi會傾家蕩產o架!』但係唔換又唔得,點可以淨係買個盤吖?要買就成套換晒!」

當然,訪問時杜太仍未知道老公的驚喜,只是可圓廿載歌手夢,已令田蕊妮大樂。「唱歌係我由細到大最鍾意嘅嘢,細個屋企好嚴,唔畀我出街,只係可以喺屋企睇電視,每逢禮拜六睇《勁歌金曲》,見到張國榮、梅艷芳、譚詠麟,我都定晒神睇,仲發吓白日夢,幻想自己可以好似佢哋咁,企喺舞台上面唱歌。」

九九年《縱橫四海》的Cat,我人在海外無緣欣賞,主觀認為這幀一三年的阿田笑握亞視高層葉家寶手,更有可觀性。

十六歲(上圖)入行,田蕊妮稱她沒有少女時代,九八年的舊照(下圖),比現在還成熟。

每天第一次

幻想以外,為家中獨女的田蕊妮還肩負起家中「娛賓」重任,「嗰時我阿爸特登買部LD機返屋企,喺屋企唱卡啦OK就係我唯一嘅娛樂,仲要成條村嘅村民話我唱得好聽。

「到參加《未來偶像爭霸戰》,贏埋冠軍,我以為自己可以出碟,原來唔係咁簡單。雖然當年我得十六歲,你睇我(一指我手機顯示她的比賽照),個樣似足三十。嗰時興玉女嘛,我點睇都唔係周慧敏、王馨平同楊采妮啦!所以今次等廿年先出到碟,我當得一次機會咁做,咩都要做到最好!」

《巨輪》的文英(上圖)一角,為田蕊妮帶來「視后」榮譽。

「冇take 2」的心態,據田蕊妮說,是她近年的體驗,「係o架,無論係錄歌、拍劇,我每一日都當自己係第一次咁面對,一take過,所以就要做到最好,有時我老公都叫我唔使咁緊張,但係有咁嘅心態,我先有動力去衝。」

這番話出自「視后」口中,難免令人認為「唔係啩?」,田蕊妮則稱:「我唔會理係咪『視后』,攞獎只係我咁啱演到一個好嘅角色,所以我先更加要做好嚟緊嘅嘢。」

下牀氣

根據田蕊妮那些不經意的「我老公」,有理由相信,她接到最好的「角色」,非「杜太太」莫屬。「可以咁講啦!有個時期,我老公紅得好快,搵到錢,佢想我唔使做,於是我冇做嘢。日日起身,朝頭早買股票,晏晝約朋友high tea,之後打牌直落,咁嘅生活過咗幾年,我就覺得自己唔開心,好迷失、做人唔得實在。」

令田蕊妮的心踏實下來的,也非杜汶澤莫屬。「我十六歲喺亞視就識我老公,由拍拖到結婚,o依家都十四年。人有三衰六旺,我就慶幸我哋有過所謂嘅低潮期,咁大家都知對方係真心同自己一直行呢條路。

「我老公成日講到我就晒佢,以佢為中心。其實我想話,係佢令我睇到世界唔同嘅一面,令我人生更加充實,而且佢都包容咗我好多嘢。以前我啲下牀氣好勁,起身嘅心情一唔好,我成日對佢嘅態度都好差。所以我覺得我老公好勁,每一日起身要睇我面色,估我心情。」

九九年,杜氏伉儷剛拍拖不久。

○四年,杜氏伉儷Benz出巡。

杜太太的版本如是,杜先生則氣定神閒道:「我老婆好簡單,有個咖啡機同麵包機已經搞得掂!總之佢一醒,未擘大眼,我去整定杯靚咖啡,遞到佢面前,我老婆心情就靚o架嘞!」

咖啡為田蕊妮的最愛飲品,訪問當天,就算沒有阿澤親手炮製,她也便添飲了一次。畢竟攜手共度十四年並非易事,因此田蕊妮於大碟內,也為阿澤準備了一份禮物。「我揀咗〈不再讓你孤單〉,特別唱畀我老公聽。我好鍾意呢首歌,仲特別錄咗兩個版本,第一次嗰個好sad,我聽番之後同Chris Babida(知名製作人鮑比達)講:『呢個唔係我想老公接收到嘅message,可唔可以錄過?』

「於是就有第二個,即係o依家出街嘅版本出現,係開心好多,亦代表咗我哋。」

聽着田蕊妮的話,我想起曲中其中一句:「路遙遠,我們一起走……」

一四年,麵包機的製成品,是杜先生口中「搞掂」杜太太的靈藥之一。

冇特別意思……

田蕊妮早年皈依密宗,我問她可有法號?「吓?藏文嚟o架喎,冇特別意思o架!好似我咁,田蕊妮都冇特別意思,我Form 2之前都唔係叫田蕊妮o架,係我阿媽有個friend對術數有研究,話我用嗰個名,就過唔到十六歲。嘩!我阿媽幾驚呀!仲即刻搵人幫我改名囉。」

「嗰個名」是否秘密?非也!「田明慧囉!都係冇特別意思,係我阿爸覺得順耳咋!」

於是,田明慧成了田蕊妮,她十六歲那年,也有大轉變:入行、認識杜汶澤……走過廿年,才是真正的「有意思」!

十四歲改名田蕊妮,十六歲就成了「冠軍」。

一幀杜氏伉儷十指緊扣照,無聲勝有聲。