為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 03 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

同心模敵

雖然有說「同行如敵國」,但對於今晚「Paco巨星飯堂」3位嘉賓嚟講,同行等如同心。Mandy Lieu(劉碧麗)、李月(BoBo)同Melanie Z.(胡惠珊),前二者合作開設Model公司「Quest」,旗下就包括Melanie等出色model,同心推動模界。

我帶3位貴賓去到位於時代廣場嘅「雲陽」,以特色火紅川菜,襯托3位現役、退役紅模,祝佢哋業績長紅!

今晚我帶Melanie 、BoBo同Mandy(左至右)去到位於時代廣場嘅「雲陽」品嘗特色川菜,暢談當model樂事。

一拍即合

Mandy同BoBo去年合資開設model公司,其實背後有一個故事,曾經擔任model、現已與商人李本勝育有一子嘅BoBo話:「我同Mandy認識咗好耐,不嬲都好啱傾,直至有一次講起開公司,估唔到佢都有相同嘅想法,跟住之後嘅嘢就好smooth,只係用咗3個月籌備。o依家做得幾好,我哋仲會去唔同地方物色有潛質嘅model,要多元化一啲。」

Mandy補充:「我哋都想為model界做啲嘢,BoBo雖然冇做model,但佢之前都係我哋一分子,所以好多營運上嘅嘢佢都可以參與。我就成副身家投資晒落嚟,o依家就有錢一齊揾,希望好快賺得番。」

BoBo婚前曾任model,所以同Mandy一講到開model公司就一拍即合。

哈哈哈!Mandy同BoBo對自己嘅生意都好上心,所以喺挑選旗下model上都滿肚密圈,其中Melanie就係BoBo一手羅致,「o依家model唔再係單一發展,好似Melanie咁,佢好有potential作多方面嘗試。」

Melanie係中、英混血兒,之前擔任Canon廣告女郎打出名堂,除咗catwalk、拍廣告之外,佢仲有一個小目標,「其實我好想主持旅遊節目,因為我好鍾意旅行。除咗英文同廣東話,o依家我仲學緊普通話,做每一行都好,自己不斷進步係好重要。」

野菌醬年糕蟹($448),蟹鮮醬惹味,值得推介。

前菜燈影牛肉($68),薄薄一片帶微辣,開胃!

八味豆腦($88)有四川辣椒等八款口味襯托豆腦,香滑!

勇闖影壇

講得啱!老闆Mandy就身體力行,闖入影壇,嚟緊佢即將有兩套電影上映:陶傑執導嘅《愛.尋.迷》,仲有同梁家輝、志偉等合作嘅《盜馬記》,「嚟咗香港做嘢10年,model嘅工作之外我都想有啲突破。拍戲畀到一種同做model好唔同嘅感覺我,好似喺《盜馬記》我飾演一個女殺手,聽落好似好cool咁,但其實係一個搞笑嘅角色,聽過一啲前輩話喜劇難演,今次就自己體驗到。

「《愛.尋.迷》就係一個新啲嘅嘗試,而拍咗幾部戲之後,我覺得自己仲有好多可以進步嘅地方,今年要繼續努力先得嘞!」

哈哈哈!Mandy潛力無限,我相信佢一定冇問題!

3位美女扮靚各有心得,話題一開始就停不了。

Mandy勇入影壇,外形已有優勢,演技方面佢話尚在學習中。

熱愛美食

唔好以為美女會為靚而少食,我仲為你哋取經,睇吓3位有咩扮靚心得。Mandy已經立即「投降」,仲話:「我好鍾意食嘢,尤其係川菜,辣辣哋刺激到味蕾,今晚就啱晒!最多之後做多啲運動去收身,平時我好鍾意去行山,通常一朝早就開始行,有時由北角行去中環,有時入西貢行,一行通常就4個鐘。美肌方面,飲多啲水好重要,通常朝早敷個mask,就事半功倍。」

一品海鮮津白鍋($198),係眾多辣菜嘅平衡。

鐵板乾燒蝦球($98),外脆內軟。

BoBo來自東北,食辣係佢生活嘅一部分,「o依家唔會刻意食好辣嘅菜式,好多人以為北方人嗜辣,但其實食辣係為咗保暖。另外,食嘢要少食多餐,食多啲生果,要戒食高熱量嘅食物。最緊要做多啲運動,我喺屋企踩單車,每日踩半個鐘,出啲汗就精神啲。」

至於Melanie就只食海鮮,其他肉類,佢統統say no,「已經習慣咗只係食海鮮,其他我都食,更加唔會戒澱粉質,要balance。護膚方面,潔面同保濕係好重要,所以我會用蜜糖同糖,自製磨砂潔面去死皮;我啲皮膚好乾,所以我鍾意用油去鎖住水分。」

話畢Melanie嘅素麵就準備好,美食當前,佢即刻大快朶頣!

水煮魚片($148)採用四川運到香料,夠原汁原味。

豆腦巴巴($58)質感香滑。

三款自家製雪糕,味道不辣但有香味。

雲陽

地址:銅鑼灣勿地臣街1號時代廣場10樓1001B
電話:2375 0800