為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 02 月 27 日

任總豪遊大阪食唔停

唔少香港人都鍾意去日本旅遊,不過近期日本面對幾十年來最嚴峻嘅大風雪,不少景點因積雪封路無法到達,唔少香港旅客敗興而歸。前金管局總裁任志剛早前亦都去咗日本旅遊,兼同太太慶祝情人節,佢原本諗住去奈良睇古廟,不過受雪災影響,市內積雪達十四厘米,令佢哋被迫放棄行程。不過任總就一啲都冇嘥時間,決定改變行程,轉去大阪擦餐勁。

任總今次美食之旅,當然唔會食得隨便,佢專挑當地馳名專門老店,例如當地老店「牛寶」,呢間餐廳係大阪米芝蓮「牛肉料理」類別嘅唯一推介,除咗食西冷、牛肋肉等大路部位,冷門部位如牛胃、牛腸等都有供應。

任總同太太出名係模範夫妻,今次一齊暢遊日本之餘,亦順便慶祝埋情人節,認真有心思!

受雪災影響,奈良市積雪達十四厘米,令任總被迫放棄當地行程,不過佢即時啟動「plan b」留喺大阪擦餐勁,一樣咁開心。

此外,已傳到家族第五代嘅大阪著名天婦羅老店「一寶」、日本第一家海蟹專門料理店「道樂」、有「壽司之父」之稱嘅「久兵衛」壽司店,任總亦一一到訪,仲食到舐舐脷。

除咗食好嘢,任總今次都有唔少新嘗試,食慣高級餐廳嘅佢,今次就試咗平民化嘅關東煮,雖然只係魚蛋、蘿蔔、豆腐,不過任總都食得好滋味;而向來着慣西裝嘅佢,難得喺outlet買咗兩條牛仔褲,仲即時穿上身,畀太座拍低佢嘅型仔照!

任總近來愛上木雕,佢唔止將屋企工作室變咗做木雕工場,喺日本期間,佢仲喺家居DIY用品連鎖百貨公司大手購買木雕器材工具,睇嚟佢回港後,可以大顯身手了!

創作木雕成為咗任總最新興趣,佢最近買落木雕機器同大量工具,去到日本,亦不忘去當地家居DIY用品連鎖百貨公司大手購買器材同工具。