為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 02 月 26 日

二千億土地基金打底 財爺醞釀《明日基金》

《財政預算案》星期三出爐,原本應該係全城熱話,不過曾司長呢兩星期不斷做期望管理,一方面警告「財政儲備必有用盡之日」,另一方面不斷有消息人士明示暗示唔會點派糖,所以外界對《預算案》好似冇太大期望。

知情人士透露,糖會繼續派,但會大縮水,金額由去年約三百三十億,劇減四成得番二百億左右。特首梁振英剛發表嘅《施政報告》被狠批當中產冇到,《預算案》就表明集中資源讓中產得益,多項免稅額、退稅措施都唔會郁;而低收入人士方面,綜援、生果金等亦會維持。

不過夾喺兩者之間嘅一群就會辛苦啲,據悉公屋免租得番一個月、電費補貼、商業登記費寬免都會無咗。政府人士話,呢個階層有公屋等基本社會保障,迫切性冇其他人咁高,惟有暫時辛苦一吓。

財爺新一份《預算案》唔會大量派糖;佢日前亦特登去政府物流署探班,答謝同事為印製《預算案》趕工。

據悉今年財政盈餘只係略高於一百億元,雖然已經畀原先預計的四十九億赤字好,不過按現時開大福利的使錢方向,未來十年出現結構性赤字並非不可預期,所以要睇餸食飯。加上根據以往經驗,派糖易消化,過後冇耐公眾都忘記得一乾二淨,與其豪派福利,不如諗清楚點執好庫房條數。

要充實庫房,一定要開源節流,不過政府暫時冇計劃開新稅項,最快見效嘅,就係提升部門行政效率。知情人士舉一個例子,現時嘅交通津貼同低收入津貼申請係分開處理的,但其實相當架牀叠屋,佢哋正研究是否可以整合,幫庫房慳番開支之餘,亦可為申請者慳時間。

不過呢啲都係小修小補,要大動作執好盤數,官場人士就提出關於成立「明日基金」的討論。現時政府財政儲備約有七千幾億,但每年日常可動用嘅只有約四千億,其他錢都有特定用途,如土地基金、中小企信貸保證基金、創新科技基金等。政圈中人預期,將現時二千億土地基金轉為「明日基金」,將筆錢「鎖起」,投資滾大佢,再作日後應急之用,是最合理的安排。

土地基金係當年九七回歸前,中方因為擔心英方將香港土地「套現」兼袋落袋,經雙方磋商而成立的。呢筆錢一直好少郁,較大型嘅調動,係○三至○四年間,財經事務及庫務局局長馬時亨為解決當時庫房流動現金不足,先後要求轉搬一千六百億至政府一般收入帳目,以解燃眉之急。政圈中人分析,反正筆錢擺喺度曬太陽,倒不如靈活運用,政府周三就會交代「明日基金」的發展方向。

官場中人話,預咗會有「梁粉」出來批評《預算案》消極,甚至彈財爺係守財奴。不過佢提醒當年梁錦松做財爺時代,便曾因財赤而大刀改革,包括減公務員人工,產生嘅混亂同官場怨氣今日仲記憶猶新。政府唔想再經歷呢種痛苦,所以明知面對批評,都決定提早逐步行,以減低社會動盪。