為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2014 年 02 月 25 日

關慧玲

《東周刊》社長兼總編輯。

蘇澤光肉緊會展擴建

去貿易發展局春茗,主席蘇澤光(Jack So)講到明,可能係最後一次以主席身份主持大局,鐵定明年不再續任。

Jack那晚特別感性,好似要為自己留下一點註腳。他八五年開始已經係貿發局成員,○七年首次被委任做貿發局主席。他好記得兩個感動時刻,其中一個係會展開幕時,由風華正茂的英國查理斯王子和已故的戴安娜王妃主持,戴妃仲即興買來一件釀滿珠仔嘅裙穿上,那位設計師開心得像中了頭獎一樣。另一件係八八年,時任上海市長朱鎔基帶團來港招商,都係由貿發局接待。

Jack話,這兩件事咁重要,因為都見證着香港由製造業轉型至服務業的里程碑,Jack話未有會展前,業界只能喺酒店租房間,再拆走睡牀做陳列廳。自從會展成為招商重地之後,即衍生各種服務行業,由銀行、會計、管理,到設計、公關,香港人再不用只得穿膠花這類工作,無形中帶着香港轉型,港人生活質素才可以不斷提升。

八六年會展動工時,都請過英女皇及皇夫做嘉賓,當時喺空地設置氣球帳幕做臨時展覽場地,點知冷氣突然壞了,焗到二人出晒「皇家汗」,佢自己都滿頭大汗。

八十年代正值中英談判,人心不安下,好多人諗移民,難得新世界發展主席鄭家純及其父鄭裕彤當年有膽識斥巨資,今天香港才能有設備一流的會議展覽中心。不過會展經擴建後仍然逼爆,好多人想來搞展覽都租不到場,而澳門、新加坡老想搶展覽呢塊肥肉,Jack十分肉緊,話再行擴建刻不容緩。

貿發局之前諗過好幾個地方,據貿發局總裁林天福話,最有可能係等會展旁邊、灣仔政府合署大樓搬遷後空出的地方,不過o依家仍然未有搬遷時間表,之前有人提過灣仔運動場可以拆卸再起,不過區內居民就好有意見,話運動場係集體回憶,另有人建議兩者其實可以並存,運動場可建在原址新建大樓的天台,不過一切都仍然屬討論階段。

阿Jack說得興起,仲講咗不少佢做港鐵時嘅舊事,包括「八達通」的誕生。原來「八達通」這個名,是他和一班朋友遊船河時吹水諗出來的。當年Jack在甲板晒着太陽,拿出一張卡介紹,話將來可以用佢搭地鐵、巴士、甚至購物都得,朋友中有人爆了句:「咁即係四通八達啦。」Jack靈光一閃,想出「八達通」呢個好名,佢講笑話最慘無註冊,無得收番專利費用。