為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 03 月 01 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

笑聲行善

人要活得開心,唔一定要停留喺物質層面,心靈上富足,比荷包富足更為重要。當然,能夠好似今晚「Paco巨星飯堂」嘅嘉賓農夫咁,同張達明合作舉行6場《張達明×農夫棟篤笑》,以笑聲為香港防癌會籌款,既放笑彈亦行善事,就最開心不過。

今晚我就帶C君同陸永,去到位於日航酒店嘅「名仕餐廳」,一邊品嘗有特色嘅法國料理,一邊細談佢哋嘅善心棟篤笑。

今晚我同陸永(左)、C君(右)喺「名仕餐廳」暢談農夫同張達明合作演出嘅慈善棟篤笑show。

拱照達明

講到今次同達明合作,C君同陸永異口同聲話:「多得達明哥唔嫌棄我哋兩個,一有人提議佢搵我哋,佢就話:『好呀!』。之後我哋就算開會、度橋,整個過程都好順利,成個show嘅嘢好快已經度好晒。」

今次最有意義嘅係,成個show唔會公開售票,但已經有其中一場成功為香港防癌會籌款。達明抗癌成功,農夫不約而同地對呢位前輩表達敬意,陸永話:「成個show有3個鐘,達明哥嘅體力其實足以應付。不過佢同我哋講,因為之前化療嘅關係,令到佢嘅聲帶會好敏感,比較難控制。」

有農夫在場,每一分鐘都好似置身棟篤笑之中,充滿歡樂氣氛。

C君即時補充:「係呀!所以今次我哋6場show,我哋拱照達明哥之外,仲會分3場、3場咁做,連續做3場,然後休息5日再做3場,等達明哥可以叉足電。」

我相信你哋同我一樣咁關心達明嘅狀況,得到農夫嘅最新update,我自然放心好多。講到show嘅內容,C君就表示:「細節上就唔可以講太多,不過我哋梗係將所有effect、煙花留畀達明哥,我哋兩個出場就連燈都唔使開啦!」

以法國火腿伴蜜瓜及青菜沙律($288)作開胃前菜,夠清新。

呢一道香煎鵝肝伴黑糖鳳梨配陳醋甜酒汁($388),整個配搭平衡,唔覺肥膩。

香煎深海帶子伴芹菜頭蓉及青蘋果沙律($288),色香味俱全。

再戰樂壇

一聽就知C君技癢開始搞gag,陸永話:「今次達明哥嗰part就會講多少少家庭事,我哋農夫就會講一啲年輕啲嘅話題。我哋仲準備好一段rap畀達明哥,而我哋都會寫啲歌喺個show入面rap。」

農夫係香港少有嘅rapper組合,2014年佢哋再次喺樂壇大展拳腳,C君話:「我覺得我哋要為廣東歌文化出啲力,o依家好多年輕一輩都聽韓國歌、華語歌,K-pop都有rap,我哋廣東歌都有rap,我希望啲樂迷可以聽番本土嘅rap歌。」

陸永附和:「好多聽K-pop嘅樂迷,未必識韓文o架,我諗聽廣東rap會有共鳴好多。」

我絕對贊同啦!對於農夫嘅新作,我非常期待!

講到喺新光戲院開show,我認為絕對揀啱地點,相信農夫同觀眾嘅距離,將會拉得更近。

C君對保育廣東歌文化有一番見解。

陸永一提兩個囡囡,即時自動波溫柔起嚟。

爸爸之樂

農夫為事業出心出力,背後分別有幸福家庭作為動力。陸永一提兩個分別2歲同8個月嘅囡囡,即展現慈父本色:「湊就唔難,又有姐姐幫手。我覺得小朋友一開始有同我嘅互動嗰陣,成個世界就好似唔同晒咁。之前同大女去in學校,個老師問我係咪冇同個女返過playgroup,我冇o架,我覺得要畀個小朋友自己去摸索,唔係畀一個框框佢。

「我有部分認同德國嗰種教小朋友嘅方式,7歲前都唔好畀筆佢寫字,要培養佢嘅想像力,天馬行空啲都OKo架。」

睇到為人父嘅快樂,但C君話暫時冇生B嘅打算:「都係享受吓二人世界先,你睇佢(一指陸永)幾多嘢諗。」

咁就畀佢哋諗好個show先!我預祝農夫同達明嘅6場棟篤笑,場場good show!乾!

餐廳設半自助式套餐,每位$598,當中主菜包括香煎龍脷魚柳伴鮮蝦慕士配橙柳香草田園沙律(左圖)以及香煎盲鰽魚柳伴青豆及燴大蒜及白酒大蜆(右圖),兩個主菜各具風味,亦同樣鮮味。

扒牛柳伴鵝肝及黑松露菌薯蓉、燴珍珠洋葱配黑松露菌燒汁($378)非常juicy。

慢燒澳洲羊柳伴蒜香羊奶芝士、脆薯餅及扒雜菜香草燒汁($458),羊肉嫩滑冇羶味,值得推介。

甜品係香杧蛋白杏仁餅伴芝蔴脆片($158),層次豐富。

名仕餐廳

地址:尖沙咀麼地道72號香港日航酒店1樓
電話:2313 4221