為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 02 月 12 日

荃灣建大本營 《香港晨報》個名有玄機

一班資深傳媒人密鑼緊鼓埋班搞《香港晨報》,據稱新報紙會係綜合性大報。本刊八到暫時報紙包租咗荃灣一幢廠廈做辦公室,據聞會請近四百人,聽講之後仲會搞埋類似動新聞的網上新聞。

一班傳媒人喺年初三飯敍時傾起,已熱烈討論有報紙埋緊班。《香港晨報》幾個核心都係資深報人,包括曾喺《東方日報》效力過的前社長郭慶榕,和前老總黃陽午、前社長助理劉韋瑋等;現時新報紙的編採阿頭、IT、行政、總務等都埋晒位。新公司以「香港晨報傳媒集團有限公司」登記,資料顯示唯一一名董事叫利婉嫻,亦喺《東方日報》效力過。

知情人士講,郭慶榕去年十二月底開始大舉出擊,由劉韋瑋挖其他報紙嘅中層管理過檔,據聞出手幾吸引,不過就搞到十分神秘,稍稍傾吓都要簽保密協議。直至近日開始挖前線記者,多咗人知,消息才漏出街。線人話,希望趕及三月埋晒班,七月一日開報,最遲亦會喺年底面世。

傳新報紙總部坐落荃、葵一帶廠廈。

蒯轍元

《香港晨報》重金招聘多名資深報界人士,黃陽午是其中一名籌組委員會核心。

外傳幕後有份搞新報紙的包括港澳發展戰略研究中心主任蒯轍元,雖然佢喺自己博客話傳佢辦報「認真無厘頭」。蒯轍元來頭甚猛,他是中共黨員,在全國高級黨政幹部著作編輯委員會任副主任,經常喺香港傳媒、尤其係親中報發表評論,支筆相當辛辣,代表作包括批評泛民係「反中亂港的賤骨頭」。

蒯轍元在內地有一定人脈,去年有人醞釀在港籌辦新報紙時,消息指佢有喺幕後幫手揸旗,最初份報紙籌得數千萬元資金,之後有人再喺城中大孖沙之間游走,以谷大投資額。有指劉夢熊都有興趣,不過本刊問過佢,劉就大大聲否認,話唔識郭慶榕等人。

晨報籌組委員會發聲明強調《香港晨報》係以基金形式運作,入面有幾個投資者,有本地資金亦有內地企業投資,希望外界唔好亂扣「左帽」。聽講呢份報紙都引起親中報章震動,不過有人話《香港晨報》未如外傳咁有官方「祝福」,純粹係一班人見有商機自發辦報。

不過,有熟悉內地嘅人叫記者留意《香港晨報》呢個名其實有玄機,原來內地好多城市都有《晨報》,例如《北京晨報》、《重慶晨報》、《南京晨報》、《新聞晨報》等等,數數埋埋都有幾十份,o依家終於都有份《香港晨報》,好似同內地睇齊咁,難怪未出版,已先被外界「染紅」。

新報紙名為《香港晨報》,內地各大城市亦有多份以《晨報》命名的報紙,感覺如出一轍。