為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 02 月 18 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

Big Boys Club

元宵佳節,慶團圓未必需要有情人,有好兄弟相伴一樣係日日好時節!今晚我就邀請咗情同手足、同聲同氣嘅伍允龍(Philip)同安志杰(Andy),係名副其實嘅「Big Boys Club」。

Andy同Philip一向予人陽剛味濃嘅感覺,今晚兄弟聚頭,講馬年展望,無所不談。我帶佢哋去到位於銅鑼灣嘅「喜記蟹將軍」,品嘗蟹宴,暢談大計!

我帶Philip(左)同Andy(右)兩位大男孩,去到位於銅鑼灣嘅「喜記蟹將軍」品嘗全蟹宴。

闖天下

啱啱返台灣同家人度歲嘅Andy,之前同Philip首次喺電影《惡戰》中拍住上,嚟緊佢放眼荷李活,已完成嘅作品有大導米高曼(Michael Mann)嘅作品,仲有同影帝尼古拉斯基治(Nicholas Cage)合作嘅《Outcast》。

「荷李活嘅製作模式同香港好唔同,每個演員都有一架休息車,入面有晒需要嘅嘢;拍戲嘅步伐冇香港咁急,各有各特色。

「同Nicholas Cage拍戲係一個好好嘅經驗,佢唔使刻意講,喺佢身上已經感覺到要點樣去同佢交流,學到好多嘢。」

Andy嘅健碩身形,並非一日練成,仲需要刻苦經營。

哈哈哈!Andy係我其中一名好欣賞嘅演員,外形、實力兼備,我最欣賞係佢溫柔嘅歌聲,○八年嘅《親愛的》,佢就開過金口唱主題曲同插曲。當然,o依家Andy迷倒女粉絲嘅,一定係佢嘅body啦!其實佢有刻意經營o架。

「平時我都係食啲cereal(穀類食品)、烚菜、烚雞肉多,一次可以食成個幾兩個月,係有時會放一日假,畀自己食多啲嘢,好似今晚有咁多蟹,真係唔會忍到口。哈哈!」

呢個全蟹宴一席10位用$6,880,共十道菜式,包括呢個香濃啤酒麵包蟹。

阿拉斯加長腳蟹兩食,一為脆皮椒鹽頭爪(右),二為卡邦尼汁焗蟹身。

喜記招牌正宗炒辣蟹,不能不試!

顯身手

同Andy一樣喺外國成長嘅Philip,7歲已經開始習武,之前我睇《惡戰》嘅預告片,見到佢立定凌空飛踢,跳得高踢得勁,今晚又點會錯過請佢即席示範嘅機會?

Philip入行由做副武術指導開始,即使近年唔少人將眼光着眼喺佢同鍾嘉欣嘅戀情上,Philip仍然未停止過發展自己嘅事業。「我熱愛武術,而電影係我宣揚功夫嘅其中一個渠道,慢慢就成為我鍾意嘅事業。好多時我都會同一啲朋友傾,或者自己諗一啲橋段,逐少逐少咁寫一個故事大綱,希望有一日可以拍成電影啦!」

我欣賞Philip對電影嘅熱誠,更欣賞佢嘅真功夫!我相信佢專注喺動作路線上發展,必有發光發熱之時。

講到大計,Andy(右)即刻收起鬼馬,Philip(左)都用心聆聽。

美食當前,Philip(左)同Andy(右)都特別生鬼。

Philip立定跳高飛踢,有姿勢有實際!

機迷黨

Andy同Philip嘅兄弟情,源於○三年嘅《少年阿虎》,當時Andy喺幕前,Philip就跟住錢嘉樂擔任幕後。十年以嚟,感情有增無減,除咗同聲同氣,佢哋嘅共通語言就係——打機!

Philip話:「我同Andy都鍾意打《World of Warcraft》,不過我哋都會睇清楚成個形勢先進攻。」Andy立即補充:「係呀!霆鋒就勇好多,見到人哋成班人喺度,自己一個都照衝埋去打。哈哈!」

一講到打機,兩位big boys立即眉飛色舞,哈哈哈!我就祝佢哋喺馬年除咗事業更上一層樓外,喺《WOW》戰場上亦不停升呢!乾!

凍食毛蟹,鮮甜無比。

鮮蟹肉炸蟹拑,啖啖肉。

蟹將軍海皇湯,除蟹以外仲有蝦、青口等材料,特別甜。

鮮蟹肉扒豆苗,清甜!

生滾水蟹粥,甘香!

喜記蟹將軍

地址:銅鑼灣謝斐道440號地下及地庫
電話:2575 7565