為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 01 月 16 日

不知父母是誰 揭朱牧悲苦身世

政圈劍拔弩張,但近期總算有單喜事沖喜一下,「佔中」發起人朱耀明牧師一班老友,上周喺沙田石門萬怡酒店筵開廿六席,慶祝朱牧七十大壽。

當晚嘉賓陣容星光熠熠,除多名泛民大佬如李柱銘、鄭宇碩、何俊仁、梁家傑等外,醫管局前主席胡定旭、運輸及房屋局前局長鄭汝樺亦有畀面出席。

胡定旭話,朱牧間教會喺柴灣,早喺七九年已積極爭取東區起醫院。醫院落成後兩人齊齊入咗東區醫院管理委員會,不時一齊探病、籌款。肥胡話,印象中朱牧當年政治色彩無咁濃厚,以服務基層為主;雖然佢健康一直麻麻,但一落區就渾忘一切,鬼打無咁精神。

至於鄭汝樺,就因參與內地扶貧而與朱牧結緣,原來Eva退休之後經常返內地幫助有需要人士,而朱牧亦一向熱心於內地公益,兩個人因此熟絡。佢話朱牧為人好有passion(熱誠),希望佢繼續心中有火。

朱牧七十大壽,筵開二十多圍,一班老友特別幫佢設計咗張大型生日卡,請來賓寫出「七十個喜歡朱牧的理由」。(張恩偉/林崢攝)

記者當晚八到朱牧嘅悲苦童年。原來佢冇乜見過親生父母,細細個父母即離異,阿爸本來想將佢送畀人養,但阿嫲唔捨得,將佢帶返鄉下台山湊大,於是朱牧一直跟住阿嫲織漁網、養雞鴨、踩牛屎,直到十幾歲時嫲嫲過身,親戚先申請佢來港。

由於嫲嫲好少喺朱牧面前提及佢生父母事迹,所以佢從來都唔知父母叫乜名,自己邊日出世都矇查查;至於相依為命嘅嫲嫲,朱牧話因為細個一直都只叫佢「嫲嫲」,對佢個名都一樣冇印象。一九五四年來港後,佢去入境處登記,但講唔出父母個名,畀登記職員寸佢「乜你石頭爆出嚟?」,搞到佢惟有即時「創作」兩個父母名,同一月二十一日呢一日做出世日期。

來港後,朱牧最初跟洋服師傅,後來有朋友帶佢返教會,又參加基層社會服務,令佢慢慢走上牧師之路。

朱牧又同記者講,佢從來都是低調過生日,不過佔中發起人陳健民同戴耀廷,見過去一年搞佔中匯集各方戰友,決定幫朱牧搞大佢,一搞二十多席,據知嘉賓名單全部係朱牧自己決定。

朱牧主張簡樸,當日晚宴一滴酒都唔飲,佢更要揀間偏僻的新酒店,貪佢有折頭便宜啲。陳健民搵埋民主發展網絡同新力量網絡等一班學者,湊足十幾萬幫朱牧埋單,當晚收到近三十萬禮金,亦全部捐去佔中等民主運動。

泛民老友如李柱銘(右)等到場慶賀外,連醫管局前主席胡定旭(中)亦畀面到賀,原來胡定旭、朱牧兩人十幾年前已喺東區醫院合作過。(張恩偉/林崢攝)

陳健民(左)話,本來得佔中三子嘅屋企人同朱牧啲老朋友同佢慶祝,但眼見近年搞佔中匯聚咗咁多老友,所以決定搞大佢,齊齊happy吓。