為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2014 年 01 月 21 日

沒Chok,鋒喜了…… 謝霆鋒

翻查資料,謝霆鋒已有六載沒有接受爆料式娛樂雜誌的訪問。但他從來都是封面人物的十大人選:走過「憤青」歲月、豐富的情路歷程、婚前婚後離婚後、翻撻不翻撻……看多了,會膩。所以,訪問當天,霆鋒分身當藝人及老闆,因他的「PO朝霆」包辦了《救火英雄》內的二千個電腦特技鏡頭,電影在港上映四天,已收過一千二百萬票房。謝老闆難掩喜色:「呢個project冇賺錢,藝術工業吖嘛,但叫做爭番啖氣。」商場上,他笑着爭氣;情路上,霆鋒坦言仍在等待中,不失積極笑容:「講真,呢啲唔係自己話得事嘅,任何關係都係有對家嘅。」坐在佔四層樓的辦公室的樓梯上,霆鋒就是在拍照時才收起燦爛笑容,不用chok樣,喜悅在心中。

嚴父的砂糖

踏進霆鋒名下的四層「PO朝霆」辦公室,極具高智能意味,先不說製作電腦特技的超級電腦,進行訪問的會議室,要「嘟」過員工證才可內進。在場有人想強行進入,老闆霆鋒也即時說:「唔好!阿X(職員甲)借個證畀我吖唔該。」

老闆沒有擺架子,公司的運作亦蒸蒸日上,有指年賺近億。我多事,問霆鋒可有想過繼承者?簡單而言,是六歲的Lucas定三歲的Quintus?

爸爸想了半秒,含笑道:「細佬啦!佢似一個讀書人多過大佬。定啲,(搖頭)定好多!阿哥調皮啲,細佬可以靜靜哋睇書,阿哥一定唔得。」

為部戲,霆鋒與《救火》導演郭子健四出「跑數」,落力宣傳。

知子莫若父,即使兩子跟栢芝住在新加坡,在剛過的新年,他們也回港與霆鋒、拉姑、四哥等敍天倫。說教子之道,霆鋒收起笑容,嚴肅的說:「打!邊度郁就打邊度,唔會唔捨得打o架,你搞到好難教咪仲唔捨得。有啲係中國人嘅傳統,好似禮貌咁,教唔聽都要打。

「o依家佢哋見人都會立正,擺好手叫人,嚟同走都要叫。食飯唔好同我戙高腳、周圍望。鬧得o架,打得o架。」

霆鋒說時,眼望前方,儼如對着Lucas、Quintus的模樣,但由於父子不是時刻相見,與子相聚時,霆鋒也有「犒賞」給他們。「我好鍾意整甜品,有時都會整吓蛋糕,焗吓啲撻仔畀佢哋食。(冧笑)佢哋都幾黐我嘅,我唔會畀佢哋玩太多iPad,而且佢哋媽咪都唔係太唔嚴嘅,應該OK。」

兩子在新加坡與栢芝生活(右圖),霆鋒在一三年的聖誕就與Mani等度過,並一展刀法切火腿(左圖)。

一定見媽咪!

霆鋒口中的「媽咪」,不用註解,閣下也理解是指栢芝。二人離婚兩載多,上月又因與子同遊新加坡而傳出復合,但男主角不以為然,只欲言又止的表示:「佢始終係兩個仔嘅媽咪,o依家我哋都盡量做一個融洽嘅環境畀佢哋,只要有佢哋,我哋都會做,咁一定會見到面嘅。」

關於愛情,霆鋒仍抱正面態度,只是緋聞,他則否認有其事。「講真,呢啲嘢自己係唔話得事嘅,係要有個對面(對方)o架嘛。愛情係重要o架!我仍然係積極嘅,不過我o依家仲係單身。」

剛過去的新年,Lucas(左圖)與Quintus(右圖)返港陪爸爸,霆鋒一攬長子,拉姑冧抱幼孫,勝過萬語千言。

夜半最難熬……

自稱單身的霆鋒,許多個晚上也一個人睡,他習慣深宵四時才入睡,而且獨寢最難熬的,不是孤單,而是背痛。「我食咗安眠藥差唔多十年,近排好少少,不過都係偏夜瞓。我係心野o架,瞓唔着就諗吓啲無聊嘢;近排天氣凍啲,個背脊就好痛,痛到食止痛藥都冇用,我自己都好忟。

「之前拍戲撻到條脊椎好差,我又搵唔到一個治本嘅方法。唔知點解背痛喺夜晚特別明顯,好多時我攤到三點幾四點先瞓着,前幾晚仲典到朝早七點……」

脊椎的傷勢,是霆鋒多年搏命的戰績,他賺的,大多為辛苦錢,近年他積極投資舖位,成了「擺花街舖王」外,還被《救火英雄》拍檔余文樂調笑他有「8個億」。霆鋒一笑稱:「邊有吖?錢我唔會特別去計。」

問他投資,霆鋒反問:「磚頭?(地產)」,我指股票,他笑得慧黠:「賣咗啦!」再正經地說:「股票唔係我掂o架,一來唔識,二來爸爸媽媽教落,逢係聽到『炒』字嘅,都唔係我玩嘅,我未夠資格。」

之後繼續以XX物業高層口脗分析樓市:「本人覺得會再回落啲嘅,o依家啲嘢仲係貴。」笑他是舖王,霆鋒回應:「我係穩陣啫。細個一路開始,我都唔識投資,所以就擺落啲唔會走嘅嘢度,舖係其中一項。」

爭回一口氣!

近年霆鋒甚少接受娛樂雜誌訪問,原因不解釋;為了《救火》,他破例「出山」,為的是:「好多人以為戲入面嘅煙係真煙,我話你知,有90%嘅煙都係後期製作嘅。就係咁,我覺得唔對路喎。所以for公司(PO)、CG,都要為香港電影爭一啖氣。」

霆鋒說時的自豪,比談Lucas、Quintus時低一點點,但也表現到他老闆的一面。「公司開咗十年,做廣告、幫電影調色都做過,《救火》係第一次做電影CG。坦白講,我初頭唔係好想接,太大壇嘢、太多時間,要投放太多資源。後來畀啲同事說服咗,佢哋都想挑戰吓自己。

「卒之用咗差唔多一年、百幾個人,嗰度好多錢o架,為啖氣,值得嘅。不過我冇參與太多,唔係我就做唔到演員嗰part,係間唔中睇吓進度。睇嘅時候,我就覺得今次可以話畀人知,電影CG唔一定要喺美國、泰國、韓國或者大陸做,香港都得。」

霆鋒放手讓電影特技總監黃智亨(右)及「PO」的3D特技總監之一關卓豪(左)處理,效果獲外界一致好評。

《救火》高潮為塵爆,霆鋒指麵粉屬真品,吸少少濕濕碎,爆得火花四起的場面,全是其員工一年的心血。

慎入茶水部

訪問時,霆鋒未跟Lucas、Quintus過新年,「PO」已是他另一個形態的「兒子」。本着取紀念品心態,我問老闆可有名片?「有兩款喎,你要邊款?」貪心是人的本性,定必通殺。一張為「創辦人」,另一張為「茶水部主管」。以為他玩嘢?手執一樽Coke Zero的霆鋒解畫:

「初時冇人知我係老闆,我亦唔想人知。 但好多時喺公司撞到行家,我要好小心, 於是咪話我鍾意呢度個pantry,成日喺度打躉。」後來老闆身份公開了,霆鋒仍保留「茶水部主管」名銜,還被專家稱為出色管理學,即摒棄傳統老闆的高高在上姿態。689請學嘢。

以為集齊兩款名片已是全套?霆鋒稱:「仲有上海同北京兩張喎,呢度冇o架。」唔該晒。