為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2014 年 01 月 20 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

回憶是黃色的

唔好心邪!此「黃色」並非有其他意思,而係真正嘅「Yellow」。今晚嘅「Paco巨星飯堂」,就特別邀請咗「Yellow!」4子:小胡、Chris、Wilson同阿銘,聯同「Yellow!」前身「野仔」嘅成員少爺占,細說組band樂與路。

我帶5位嘉賓去到位於佐敦嘅「拍板小館」,一邊品嘗有特色、價格親民嘅小菜,一邊回憶「Yellow!」嘅音樂歷程!

今晚我帶阿銘、Wilson、小胡、阿占同Chris(左至右)去到佐敦嘅「拍板小館」歎住中菜傾音樂。

由野仔到Yellow!

通常人會隨着年齡增長而變得成熟,「Yellow!」亦唔例外,由「野仔」變成「野佬」,最近仲出埋大碟《Our Memories Are》,小胡坦言:「o依家做音樂同一般打工仔完全唔同,起碼我第日死咗,我嘅音樂仍然留喺人間。我覺得自己做咗一啲同普通人唔同嘅事,唔同人聽到我哋嘅歌,會令佢哋有唔同嘅回憶,咁樣我已經好開心。」

阿占(中)雖然唔係樂隊成員,但佢有心地着件黃色衫撐兄弟。

我欣賞佢哋對音樂嘅熱血!另一位成員Chris話:「我希望有更多人認識『Yellow!』,始終我哋玩咗四年音樂,有時仲有人會問我哋係邊個。唔係話我哋啲歌唔好,只係我哋比較少曝光;玩咗咁耐仲畀人問乜水,總有少少尷尬。

「所以我哋更加要做啲與別不同嘅歌,令更多人認識我哋!」

哈哈哈!「Yellow!」對音樂嘅熱誠,我絕冇懷疑,講到由仔變佬嘅心態轉變,少爺占即時報名:「我同『Yellow!』識咗好耐,大家一齊夾band一齊成長,到o依家我仲就嚟做人爸爸。講真,以前出騷分錢要分好多份,o依家我一個人袋晒,做佬、一支公都幾好o架!」

拍板雞煲翅($398/4位)落足料炮製,雞湯夠火候。

日本關東遼參($260/條)燜得入味!

鮑汁扣原隻花膠($268/隻)價錢經濟外,亦煮出心思。

嘗試不同風格

哈哈哈!一聽就知阿占講笑啦!小胡再話:「雖然我哋仲要分4份,但都enjoy成個過程。今次隻碟就係集我哋兩年心血而成,7首歌隻隻都派過台。入面仲有我哋4個嘅親筆答謝信,o依家少咗人買碟,我哋都希望仲買碟嘅樂迷,會買我哋嘅碟。」

阿銘、Wilson同小胡(左至右)仍然對音樂有火,值得欣賞。

阿占(左)同Chris(右)相識多年,現時仍時有聚會。

講到新碟,4子不約而同對〈星火〉情有獨鍾,Wilson話:「我哋今次搵咗唐寧拍MV,佢係我哋一致認同嘅女神,真係同我哋一齊成長。不過,因為我哋想個MV同平時啲band嘅MV唔同,所以只係派小胡做男主角啫。」

阿銘補充話:「成個感覺都會比以前成熟啲,唔係只係外貌、衣着,或者係曲風嘅轉變,而係心態上我哋個個都成熟咗。而且我哋仲有嗰團火喺度,我諗我哋都想keep住呢團火,繼續做音樂!」

水煮沙巴龍躉($198/例)魚滑又夠香辣,係我嘅推介。

蝦子柚皮鵝掌($108/例)醬汁香濃。

開騷賺奶粉錢

心態成熟,同成家立室大有關連,好似阿占咁,今晚我都不忘提醒佢,為人父之後心態會有更大轉變。「o依家都轉變緊嘞Paco,BB喺3、4月左右出世,之後我就要籌備9月開嘅talk show,搵吓奶粉錢。」

哈哈哈!講到開騷,除咗要賺奶粉錢,亦係阿占嘅project,「13年我做咗《朱豔強口口笑》之後,都想喺今年做多一個延續,係我14年其中一個計劃。另一個就係BB啦,責任大咗,就要再落力啲做嘢!」

咁我一次過先祝「Yellow!」新碟大賣,再祝阿占嘅新成員好似佢咁口齒伶俐!乾!

今晚夠晒陽剛味,有美酒佳餚加上音樂,錦上添花。

將為人父嘅阿占,今年更出力搵奶粉錢。

秘製蜜絲骨($88/例)外脆內juicy。

安格斯牛粒($98/例)選用一級材料烹調,亦相當惹味。

半煎煮燜躉腩($168/例)魚肉配合魚湯,雙重享受。

冰花燉官燕($280/位)夠滋陰!

拍板小館

地址:佐敦偉晴街14號地下
電話:3565 4328