為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2014 年 01 月 09 日

謀再衝軍營擲番茄 港英旗幫亂踩地雷

社運圈中的激進派,近期玩嘢攞威去到失控的程度。以挑動中港矛盾的聞名「香港人優先」幾名核心成員,趁上月二十六日「拆禮物日」衝入中環解放軍營內,揮舞港英旗亂衝亂撞,擾攘幾分鐘,才由幾名站崗解放軍將佢哋請出軍營閘外。今次係回歸以來首次有人衝軍營,引起中港兩地極大關注。

有線人向本刊透露,衝軍營的張漢賢、招顯聰等玩火玩上癮(本刊頭條詳細報道佢哋底細), 完全不按牌理出牌。據講佢哋見拆禮物日衝擊得手引起傳媒注意後,密謀元旦日再衝擊一次,仲想帶埋番茄、氣球和一堆毫子散沙等去現場亂掟。點解係要帶呢幾件「架生」?原來佢哋話軍人對鞋較跣、踩中爛番茄同毫子,即使唔跣到一仆一碌,亦唔會咁容易捉住佢哋。好在警方早一步收到線報,採取行動拉人,先至冇爆大鑊。

「香港人優先」兩名核心張漢賢(紅衫)、招顯聰(右)闖軍營搞出軒然大波。

張漢賢、招顯聰的瘋狂行為,連泛民示威常客亦覺得匪夷所思。據泛民線人話,佢哋今次差啲闖出彌天大禍,因為門口站崗士兵都有槍喺身,糾纏間萬一擦槍走火,肯定大件事;好在士兵們好忍讓,推推拉拉咁請班人出閘口。如果件事喺美國發生,隨時畀人以電槍侍候,甚至開槍辣低,命都無埋。

解放軍堅守香港駐防事務,一向低調行事,務求與香港人和平相處,既冇干涉香港內部問題,更加唔應該被捲入政治漩渦,而軍營實在屬於法律列明的「禁區」,擅自闖入已屬觸犯刑事罪行,香港唔應該容忍呢類愚蠢行為。

張漢賢(左二)、招顯聰(右)最早先與陳梓進(右二)等人合組「我哋係香港人」,後來拆檔。