為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2014 年 01 月 11 日

鄭多燕凡人仙子

鄭多燕,不知哪時成為了一種運動的稱呼,「唉!食咁多嘢,聽日要跳番啲鄭多燕先得!」世人差點忘記了,那是一位四十七歲韓國師奶的名字。

鄭多燕上有老公、奶奶,下有一對仔女和四隻狗,白晝教天下肥師奶(或靚女)跳舞瘦身後,晚上返到家中仍有一堆煮飯洗衫,餵狗抹枱之類的家頭細務助她繼續健美,沒有停止的一秒鐘。

「其實我以前好內向又怕醜,係完全唔會同人溝通嗰啲,真係冇諗過會好似依家咁受歡迎!」

成功助女人變靚,不少人當她神仙般崇拜,然而鄭多燕始終只是個普通人。不同的是,可能她身家比較多,大概有幾百億won。

一切皆因老公

時間回到上世紀,任職室內設計師的鄭多燕,未婚、未減肥,過着日出而作,日入而息的沉悶生活。

「我以前乜都鍾意食,尤其係熱辣辣嘅湯飯撈牛油,要加多隻生雞蛋,仲有唔少得增加鮮味嘅紫菜!運動當然係一啲都唔做。

「真係冇諗過會好似依家咁受歡迎!我以前好內向又怕醜,係完全唔會同人溝通嗰啲,依家嘅性格已經調轉晒!」

婚後,一對仔女的出生,令這個愛吃又懶做運動的「阿豬媽」,體重更加一發不可收拾,五呎四吋高的她,體重一百五十五磅。

「我都知自己身材一路走樣,日日提心吊膽老公出面識第個女人,日日check佢部電話,佢仲笑我係『鄭刑警』。」某晚,兩公婆齊看電影《九個半星期》(9 1/2 Weeks),老公指着女主角金碧辛嘉(Kim Basinger)說:「點解你同佢年紀差唔多,但係人哋咁索?真係好懷念你婚前個樣!」鄭多燕看見老公欣賞靚女的眼神,只有扮倒垃圾走出門口喊。

「如果冇咗金碧辛嘉,我一定唔會有今日。」其實,金碧辛嘉還年長過鄭多燕十三歲。

瘦身前的鄭多燕體重一百五十五磅,穿了鬆身衫只有令外觀更差,幸得身邊奶奶鼓勵,轉型成功。

鄭多燕首次來港,在wtc more世貿中心帶領多位明星跳2014年全新塑身舞兼玩倒數迎接新一年,有指她今次來港淨袋七十萬港元酬勞。

全日運動

萬丈高樓從地起,失敗乃成功之母,自古成功在嘗試。

「一開始減肥梗係辛苦啦,又唔識正確方法,試過唔食嘢、食減肥藥。試過兩日淨食蘋果,跟住四日淨食西瓜,卒之酸得滯要猛咁食飯;又試過包住保鮮紙焗桑拿,卒之暈低入咗急症室。」

如此「土法煉鋼」,「大躍進」當然失敗,死傷枕藉。

「奶奶見我日日做完家務嗌呢度痛嗰度痛,就叫我唔好淨係識得嗌痛,不如出去做吓運動好唔好?我就去請教醫生應該做啲咩運動。初開始真係好辛苦,做咗一日,停足一個月先再做一日。」

鄭多燕的熱潮勁,連「左麟右李」、《金雞sss》的盧海鵬、王菀之都要跟一跟。

努力三個月,鄭多燕減掉四十幾磅。

「老公性格比較靜,咩都唔會表現出嚟,佢冇讚過我,但我覺得佢係鍾意嘅。佢有一日突然間講,如果讚我就會驕傲,仲叫我唔好聽人哋讚我靚,唔係真心o架,人哋講笑o架咋,因住體重反彈添喎。不過我個女就好鍾意返學講,成日搵埋一班人嚟同我做運動,我又煮飯畀佢啲同學食,都幾開心!

「依家係享受運動,時時刻刻都做。我喺出面做完嘢返屋企,仲有好多家頭細務要執,又有四隻狗仔要服侍,真係直至瞓覺嗰刻都運動緊,坐喺梳化嘅時間係零!喺屋企做家務都係做運動,長壽嘅人都係因為不斷郁動咋嘛!」

昨天的肥師奶,已成為今日率領數百健身教練的鄭老師。

兼職設計

瘦身成功,鄭多燕於○三年才把自己的故事公諸於世,旋即成為師奶偶像。近年深受亞洲女士歡迎,她獨家的FigureRobics片段在YouTube點擊率已過百萬,瘦身書籍和DVD也推出了好幾個語言版本,她亦於距離首爾兩小時車程的地方開設JETA(Jung Dayeon's Exercise Trainers Association),至今已培訓了二百名教練,早前更拓展至日本開設JETA Japan。訪問當天,她就身穿她研發兩年的自家提臀塑身褲,每條售近千元港幣。「我平時鍾意着闊身衫,因為我動作大。啲人成日以為我鍾意着得好暴露,點知一見到我就好失望!只係拍片時先會着嗰啲衫,每逢有新動作,我仲會設計啲新衫畀自己同後面嘅助教着!」

鄭多燕身家數億港元,年收亦過千萬,但她老公卻曾生意失敗,債務纏身不欲連累身邊人,兩人曾被迫協商離婚。現在復合後比以前更恩愛,老公還幫忙管理健身中心。「我哋兩個從來唔會喺仔女面前嘈交,我幾忙都好,都一定煮晚飯畀老公、奶奶同仔女食。」獲韓國人推崇為「最理想身體」,變靚後的她卻沒有半個飛來蜢。「真係冇人追我喎,或者我始終覺得老公係最好!其實依家都幾好,間屋都好夠住唔需要搬,只係啲狗成日喺角落頭屙尿有排抹!」

健康飲食

羅馬不是一天建成的,鄭多燕每天都注意飲食,配合運動,其實人人也能得到「最理想身體」。她每天吃六餐,要在覺得肚餓前先吃東西,西蘭花蘋果汁也可以當一餐。

「碳水化合物好緊要,唔好淨係食白飯,可以加栗子同埋豆類。如果你想食麵包,不如食豬肉,有更多蛋白質。講到菜嘅纖維素,喺椰菜同西蘭花之間,我就一定揀西蘭花,因為有好多維他命,我經常食。

鄭多燕紅遍亞洲,不但獲台灣師奶追捧,日本也有她的電視遊戲和書籍。

「太鹹同辣嘢我都唔食,奶奶有高血壓、糖尿病,所以我都係低鹽煮食,食得好健康。但係如果有美食當前,我都會盡情食,最多之後做番運動啫!

「我每分每秒都諗緊新動作,下一套動作要為咩人而做,冇理由同一個動作做足一世o架嘛!」

鄭多燕的塑身王國如此成功,運動已成為她的使命,不過她從來沒有忘記,她另一任務。

「喺老公面前要似番個女人,唔係話管理好自己就得,而係為咗老公,你可以做乜嘢?」

老師這句說話實在發人深省,令我想借美國甘迺迪總統於一九六一年一月的就職禮上名言,以男人角度說一句:「Ask not what your husband can do for you; ask what you can do for your husband。」

鄭多燕每天堅持為家人煮飯,看老公的神情,是滿意到爆的表現。

在銅鑼灣的勁舞派對中,發現疑似鄭多燕老公隨行。本來她們於一月一日回韓,但後來決定多留幾天。

坐言起行

一天六餐,尚且有些難度。時間關係,敝家大廚聽罷鄭老師一席話,把本來用作煲紅豆沙的紅豆,配搭土瓜灣街市栗子,煲出色澤微紅,健康怡人的紅豆栗子飯。

吃慣瘋狂起沙,冰凍可口紅豆沙的我,在這碗飯中,找到前所未有的感覺,印象深刻,飽肚又健康,抵鄭老師成功。

做運動也好,做人也好,說了就要做,坐言起行。只因,齋噏危害健康。

無論台上台下,鄭多燕都是鬼鬼馬馬,找她集郵影合照,她更是來者不拒。