○九年八月，本港爆發甲型H1N1新流感疫潮，導致六十人死亡。

在累積三萬四千多個病人之中，童愛玲及兒子王子毅也在其中。

為人母者與生俱來擁有要為子女犧牲的基因，童愛玲不顧個人安危，通宵達旦照顧兒子，兒子病癒，她卻情況嚴重，隨後更感染了肺炎，生命危在旦夕，慶幸最終能化險為夷，在病榻上重新站起來。

母愛偉大，感動了當年六歲的兒子，「佢成日將呢件事講畀人知，父母付出嘅嘢，小朋友係知道嘅！」兒子懂得感謝，隨之而來的便是尊敬、欣賞與疼愛；母子經歷H1N1的險境，凝聚了密不可分的關係，世界再變，骨肉親情永遠也不會動搖。

十年前，童愛玲為丈夫誕下兒子王子毅，為了陪伴孩子成長，她於兒子三歲時便決心淡出娛圈。

由零開始

九三年加入娛圈的童愛玲，○三年下嫁從事IT行業的王敦民，同年十月誕下九磅八安士的兒子王子毅。兒子三歲時，她決心淡出娛圈，原因是：「當年母親節，個仔間幼稚園有慶祝活動，叫媽咪一齊去學校參加，但嗰陣我喺番禺拍緊戲，好辛苦先請到假半夜返落香港；去到學校，我見到個個媽咪拖住啲小朋友行出嚟，唯獨我個仔由老師拖實，我即刻行上前拖番住佢。雖然佢咁細個都唔知係咩事，但我就有好大感觸，覺得如果我當日冇去到，我會令到佢孤伶伶，好自責。自此之後我就決定要擺番多啲時間喺家庭上，我唔想錯過個仔成長嘅每一個片段。」童愛玲紅着眼憶述。

兒子現於國際學校就讀五年班，性格外向又樂天；童愛玲認為，小朋友也應該擁有自己的free time，跟朋友相處，否則便學不懂社交技巧了。