黑妹做聖誕老人
一年一度嘅聖誕又嚟嘞！為慶祝呢個普天同慶嘅日子，日前《東周刊》搞咗個聯歡會，好等各位同事聚首一堂開心吓。
今年東姑有幸再請到舊年都有嚟嘅李麗霞（黑妹）做嘉賓，而今年為咗隆重其事，黑妹姐仲帶咗兩位契細佬李天翔同趙永洪嚟抽獎助興。向來出手闊綽嘅黑妹姐又點會兩手空空咁嚟，呢日除咗帶人出席，佢仲帶咗部Samsung Galaxy Note嚟做禮物。各位同事見到當然兩眼發晒光！
黑妹唔止嚟做聖誕老人，仲帶埋契細佬李天翔（右）同趙永洪（左）做抽獎嘉賓，好熱鬧呀！
壓軸抽獎嗰陣為咗增加氣氛，TVB「爆騷王」趙永洪仲主動加碼，攞出一千蚊做現金獎；至於李天翔見到亦都唔執輸，又自掏腰包加碼一千出嚟抽，結果二千大元由一位女同事奪得。黑妹姐嘅駕臨一年比一年驚喜，佢亦不斷到老人院做聖誕老人慈善獻唱，帶多啲歡樂畀每一位老人家，夠晒善心。
抽獎期間，李天翔竟抽到趙永洪，為搞氣氛呢位「爆騷王」加碼一千元出嚟再抽過，認真闊綽。
