中策組爆逃亡潮 特首盃撻Q

中央政策組自邵善波去年七月上任做首席顧問以來，一直以惹火見稱，有政府中人透露，最近中策組內部相繼有人跳船，令邵大叔十分頭痕。

查實邵大叔上任冇耐，已經大換血，一個月內踢走六個職員，炒咗研究團隊三分一人。邵大叔想建立自己馬房無壞，但新請嘅人卻有如走馬燈，過去一年已經搞咗四輪招聘，好耐未試過full team做嘢，有政府中人話，係因為班後生仔頂唔順邵大叔嘅「思想領導」。

中策組現時有個高級研究主任位懸空，連同其他行政主任、研究助理等空缺，共有七個位請緊人。消息話除咗人事關係，工作滿足感低亦係原因，「中策組要跟邵大叔『指導思想』，但報告落到政策局，往往畀人改到面目全非，好似上年嘅《施政報告》初稿就被大改，搞到大家相當無癮！」

邵大叔坐正中策組只有年幾，太多搞作結果搞到年尾的特首盃都無法如期舉行。

最近邵大叔有新動作，就係搞「中國講座」畀官員，但講題都幾偏門，例如搵「中共黨史人物研究會副會長」章百家講「改革開放的歷程、經驗與當前的問題」；或者上海社科院嘅周建明和中國社科院嘅黃平講「2020年：中國與世界」，仲要一講至少兩個鐘，有公務員覺得幾惡啃。

呢位公務員話，劉兆佳在任時都有搞講座，「CEPA有新嘢，就搵人深入講CEPA；愈來愈多八十後出來，就搵專家分析八十後特點，全部都跟貼社會議題」，但邵大叔搞嗰啲，「除咗夠『紅』，睇唔到有咩幫助！」

中策組早前大鑼大鼓話要喺年底搞「特首盃」，希望社會和諧啲，但眨眼到年尾，中策組仲有大把嘢跟，有參與籌組工作嘅商界人士話，「特首盃」最近已宣告撻Q，留番二○一四再見。