李慧玲會馬丁肥佬黎 3「L」飯局密密斟
被商台調職的名嘴李慧玲，除了緊守崗位，留守商台至最後一刻外，近日頻頻四出飯局，上周六晚本刊就發現她到壹傳媒老闆黎智英位於加多利山的大宅作客，飯局同時亦有大狀李柱銘。
三人邊食飯邊密斟至夜晚八點幾至散局，李柱銘自己駕駛紅色寶馬房車離開，緊隨其後的一輛屬於黎智英的一部平治房車亦高速駛離，不過就落晒窗簾，估計是李慧玲。約五分鐘後，黎智英從室內步出，離遠看着閘門方向，未幾返回屋內。
李柱銘和肥佬黎熟稔，二人不時飯局，甚至經常邀請陳日君、陳方安生到府上作客，不過同李慧玲、李柱銘呢個3「L」（三個姓氏都係L字母開頭）組合又確係少見，莫非一齊傾留守大計？
李慧玲話今次飯局冇傾到商台風波，實情三人有乜密偈就不便透露，馬丁飯後自行駕寶馬離開。
本刊記者先向李柱銘查詢，李笑指不回應事件，不過，佢被記者影相就好似有啲意見，「你哋嚟影相其實都唔係咁好，我大方畀你哋影冇問題，不過你打嚟問我，我就冇嘢補充嘞！」
李慧玲喺星期一接受本刊查詢時指，同唔同界別人士食飯係佢工作嘅一部分，「飯局當日下晝我去咗程翔屋企食飯，星期五同馬時亨食飯，星期一又約咗林大輝食飯，都係一般聯誼、收風工作啫！」
佢話同李柱銘八十年代開始已經有約食飯，黎智英九十年代搞媒體之後亦都有約飯局。不過，大家每次食飯冇特定話題，今次亦唔係因為最近商台風波先約食飯，至於飯局有冇其他密偈，李慧玲回應一句：「乜都有傾啲啦。」
重回《左右大局》一個星期，記者問佢有乜感覺？李慧玲覺得係有唔同咗，至於係邊方面唔同咗，佢就笑住回應話，「咁就要另外搵個時間先同你講啦！」
