萬人黨被拖累 吸新血遇阻力
號稱「萬人黨」嘅民建聯，作為本港政壇第一大黨，無論財力同人手，都領先其他黨幾個身位。不過，最近有民建聯核心就同本刊吐苦水，話近期搵新血愈來愈難。
該核心話，由於近年政治氣氛愈搞愈差，公眾對政府嘅不滿直線上升，新生代好容易將不滿情緒投放喺幫政府護航嘅建制派身上，而作為政府密友嘅民記，自然首當其衝。佢透露，民記新血數字雖然未至於插水，不過相比○四至○七年吸納咗李慧琼、張國鈞、周浩鼎、甚至係蔣麗芸等人，現時新血氣勢確係明顯遜色。
三位○四至○七年入黨嘅黨員張國鈞、蔣麗芸同李慧琼（右起）現時已經貴為黨嘅副主席，同近幾年入黨嘅新人比，確實係有差距。
民記當年為打造萬人黨，不惜落重本進行新人招攬工程，李慧琼等人入黨後，更粉墨登場拍宣傳片賣廣告，喺巴士Roadshow電視巡迴播放，引來唔少有實力嘅「飛來蜢」；不過，近年民建聯喺搵新人方面力度細咗，又欠缺有吸引力嘅面孔做招牌，加上議會新人如蔣麗芸、鍾樹根等又唔多爭氣，兼且惹火，變相幫個黨「倒米」，亦令民記吸引力明顯跌watt。
據講，民建聯為謀政黨長遠發展，明年又適逢青年民建聯（青民）成立十周年，重招新血重任就落喺呢班後生仔身上。青民主席周浩鼎同本刊話，民記明年元旦會搞個大型慶典，慶祝之外，同時啟動為期一年新血招募大計。
周浩鼎講到明，招募新血會係明年青民嘅重點project。佢仲話民建聯定位其實係「專業跨階層」，但近年好似愈來愈偏向基層發展，所以佢哋會集中向工商專業背景嘅年輕人士埋手，令個黨「重返正軌」。
