佳景股價爆升 「譚詠麟」值兩億

大陸企業鍾意搵明星做代言人，事關好多時有名人推介產品，即時聲價十倍，銷量馬上爆升，此之所以內地大明星有價，等閒冇一千幾百萬都唔使旨意請得佢哋郁。

不過，香港藝人都不遑多讓，雖然對公司業務推動未必可以媲美內地企業，但喺資本市場的作用，原來不容忽視。好似最近搞左麟右李演唱會的譚詠麟，佢做咗佳景集團（0703）旗下澳門間英記餅家代言人，即時令股價爆升，你估佢三隻字值幾錢，答案係兩億。

譚詠麟個名認真值錢。

英記係香港上市公司佳景集團旗下餅店。

唔係講笑，佳景宣布譚校長做英記代言人翌日，公司股價即時大升一成，由兩個九毫九，高峰時一度上升至三元四角一仙，收市略為回軟，但都報三元二角八仙。市值就由十八億八千萬升到廿億六千萬，換言之因為譚校長效應，成間公司市值大增幾近兩個億，你話請譚校長呢筆錢花得幾咁划算。

今次譚詠麟代言期為五年，公司除向譚校長支付表演費外，最重要送咗五百萬購股權畀校長，相等於公司發行股本百分之○點八，每股行使價三元零七仙。

澳門手信行業成行成市，搵個名人做代言，有利促銷。