為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2013 年 10 月 22 日

關慧玲

《東周刊》社長兼總編輯。

王維基「找死」

王維基不獲發電視牌,竟然演變成社會運動,令佢人氣急升做埋英雄,本周日有逾十萬人出來撐佢,相信政府都始料不及。其實,出來行的人其實未必個個撐王維基,更多是反對繼續被陳腔濫調節目污染眼睛、無得揀焗住睇的心態。

王維基是個幾自大的奇人,聽早年和他合作過的人說,當年他在城電時,以小博大打贏電訊大戰,自信心爆棚,同事都尊稱他做「皇上」,皆因他每次開會總是說得天花亂墜,他說一,無人敢說二,大家唯命是從。

那時他做決定相當快,最憎蠢人和最怕人問他愚蠢問題,在他旗下工作,要有被他當頭棒喝的心理準備。

有種人天生鍾意冒險,王維基就愛挑戰高難度,由九十年代白手興家創立城市電訊,想出引用回撥方法成功挑戰香港電訊,到成立香港寬頻,豪擲十億元鋪線,至如今燒錢搞電視,每一次都像是亡命表演,初期不被睇好,卻總被他過到關。一般人去旅行多數睇風景或行街買嘢,他卻愛潛落深海同鯊魚游泳,去南非睇獅子老虎,爬喜馬拉雅山,又參加毅行者。他曾說過鍾意尋找死亡,搵到自己鍾意的事,然後「死落去」。

有位早年聽過他在中大演講的朋友說,那時他公司規模不算大,但言談之間已有股傲氣,當時科網熱還熱火朝天,朋友曾經問佢,科網股無PE無盈利,卻可以在市場集資咁多錢,好虛浮啫?王維基以一副先知的口脗說,個遊戲玩法唔同咗啦,之後又口若懸河分析咗一大輪。

這位上司,鼓動人心有一套,縱然他不易服侍,卻有一班下屬由城電時期一直跟到現在,且全部都是女將。這三年搞電視台,朝夕和製作人、明星相處,令他銳氣改變不少。

聽說,很多時他和製作人開會,意見都被挑戰,尤其是一些八十後的年輕編劇,換了在從前,他可能會叫人「Shut Up」,但今日一言堂的做法已行不通,他就改變策略,先坐下來聽,之後借用觀眾睇試映版劇集後的反應去游說班編劇。此外,他叫編劇學習美國劇集拍攝手法,都曾令資深人員有點反彈,不過佢鼓動人心的一套依舊好使好用,例如他會說無可能有人做同一份工,十幾年都係一萬蚊月薪啫,令下屬覺得呢個老闆會懂得企喺打工仔一方。

王維基盤電視台生意相比有線和電盈,財力相對弱,不過搏到盡從來是王維基的作風,他之前不斷造勢,又將劇集放上YouTube畀人睇,不斷谷高坊間對佢電視台的期望。博到有牌當然海闊天空,o依家博不到,難為跟他搵食的員工都要散檔。可是被炒的員工,竟反過來多謝他兼且難捨難離,不得不佩服。

去年底王維基曾為了個牌不斷搵人飯局,向人請教仲有咩方法可以跟政府周旋下去,今次亡命之旅遭遇滑鐵盧,說過為「找死」而搞電視的他,變咗求仁得仁了。