為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2009 年 08 月 11 日

田少回朝 助細佬登基

田北俊再任自由黨中委,遲些更做埋常委。佢重返權力核心,目的之一係為田二少做一哥鋪路。

早排在某場合碰到田少,佢話趕住返屋企,因為個孫仔喺大宅泳池學游水,佢又去玩埋一份,一派樂也逍遙模樣。如果唔知佢近期動向,仲以為佢已修心養性,不問世事,頤養天年。

實情完全唔係咁。舊年田少因自由黨選立法會輸到仆,「引咎」辭去所有黨內職位,講明以後不理黨務,畀一班新領導人揸fit,當時佢諗過開個名譽主席位自己坐,做其垂簾聽政太上皇,後來因眾議紛紛,至被迫收band。但佢重掌大權之心未死,最近就積極行動返回自由黨核心領導層,線人話佢呢個動作有幾個意圖,值得注意。

早排自由黨中央委員會改選,田少唔聲唔聲坐番入去做中委。線人話,呢步棋只係第一步,自由黨嘅權力核心——中常委,將於下月選舉,田少會再選上一級,名正言順做番大佬。

據線人拆局,田少今次回朝,有三個目的:首先係幫佢細佬田北辰鋪路,日後登基做自由黨主席。實情在一年前,田少已有呢個想法,當時佢大力捧細佬出嚟參加立法會直選,仲調動黨內大量資源,幫細佬打選戰,如果勝出就扶二少做主席,達成「兄弟黨」之宏願,但人算不如天算,二少落敗下馬,登基成空。今次田少重返自由黨權力核心,就係想在內部發功部署二少坐正。

現時自由黨阿頭雖然係劉健儀,但呢位阿姐多數時間處理立法會工作,地區黨務同培訓新兵就由田二少負責,呢位「儲君」亦積極進入角色,頻頻落區指揮黨部做嘢,好似G-2000老細去巡視分店咁,搞到一眾地區議員冇時得閒,做到手軟,究竟邊個係真正阿頭,大家都心裏有數。

兩兄弟操控黨務

自由黨主席劉健儀只負責立法會工作,黨內由田二少揸fit。

線人話,今次田少失驚無神選入中委,率先撲出嚟解畫嘅唔係劉健儀,而係田二少,佢話大佬當時退出中委,係倉促咗啲,現時自由黨要積極做好地區工作,重整組織,大佬係「過來人」,做番中委之後可以幫到手。呢個講法同劉健儀嘅口徑好唔同,阿姐話田少只係關心個黨,唔會參與日常黨務。睇嚟田二少講嘅至係事實,以後黨內組織工作將由兩兄弟揸晒fit。

田少做中委第二個目的,係召集人馬在幾個界別搶位,準備下次立法會選舉時,同「叛將」林健鋒等組成之「經濟動力」撼鋪勁,重奪失咗嘅議席。線人透露,田少爛船有三分釘,在業界仍有一批盟友及親兵,近期佢已着手在總商會、工業總會、紡織界及旅遊界布置人馬,擺明分別針對林健鋒、梁君彥同梁劉柔芬,部署日後從三人手中搶回議席,重振自由黨聲威。但「3L」亦非省油的燈,早已積極鞏固陣地,在業界拉到一批核心人士加盟,田少個算盤愈嚟愈難打響。

線人話田少仲有另一盤算,就係唔排除二○一二年參加「特首擂台大賽」,如果自己搞番起個黨,出嚟玩並非無可能,就算最後唔玩,仍有多啲籌碼同參賽者討價還價,攞番啲好處。

譚志源開工

譚志源出任特首辦主任,外界有人唔睇好,話佢未夠級數,其實呢種睇法係「只觀一面」(單看資歷),未了解佢嘅特質,就好似相馬咁,好容易睇錯。認識佢嘅老友話,呢位仁兄轉數快,應變能力唔錯,而且做過幾年財政司長新聞秘書,好了解傳媒運作同心態,亦懂得同傳媒打關係,可幫到煲呔加強形象,抵銷負面攻擊。

好似最近校園學生驗毒單嘢,計劃一出嚟,反對浪潮立即湧起,連天主教教區都話要hold住,傳媒慣例彈多過讚,政府反應慢啲都死,估唔到高層出手亦快,孫公講完後,黃仁龍即撲出嚟接拳,到周末更見到煲呔亮相大大聲話:「唔可以再拖延啦!」睇嚟譚志源有份建議煲呔咁做,因為正如鬍鬚學者蔡子強嘅《君王論(五)》所講,在危機時,the leader must be visible,相信以譚老兄嘅經驗,會好明白此道理。事實上,煲呔一出聲,政府推動驗毒計劃嘅聲勢就返番嚟。

講開又講,將出任新聞處處長嘅黃偉綸,同譚志源係港大師兄弟,早佢兩年加入政府做AO,兩人份屬同門,亦係老友,將來應可以組成合拍雙打,重整傳媒策略。

呢位靚仔AO乃醒目仔一名,能文能武(本身亦係運動健將),人緣唔錯,公關能力亦佳,將來同傳媒打關係會係高手。特首辦呢隊新team,應可帶來新氣象。

譚志源轉數快,識得同傳媒打關係,可以幫到煲呔加強形象。

靚仔AO黃偉綸出掌新聞處,同師弟譚志源是合拍雙打。

陳茂波死守滙豐 勁賺三十粒

立法會休會,唔少議員外遊散心唞一唞,陳茂波就成家去咗意大利中部,逍遙於地中海山水之間,十分疏乎。佢今次遊埠,去得好開心,一來立法會工作算幾順利,二來佢死守愛股滙豐,終於守得雲開,大有斬獲。

波哥年初持有二萬幾股滙豐,入貨價百幾,其後滙豐股價插水,跌到三十幾蚊,仲要供股添,佢曾經諗過放手,但因為多年鍾情大笨象,最後決定照供。唔單止咁,當滙豐升番三十九蚊水位時,佢仲入咗萬幾股,連埋所供股數總共多咗一萬五千股。自此之後,滙豐一路「巴巴聲」上升,到咗六十幾蚊之時,佢就放出新持嘅股份,一鋪就賺咗三十幾萬。

佢另外又在低位三次掃入中國海外(688),入咗二十幾萬股,最近隻股升破十八蚊,盈利極之可觀,足夠佢遊十次意大利啦!

陳茂波鍾情大笨象終有回報,守得雲開大有斬獲。