為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 08 月 14 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

剛陽熱燒

今晚嘅金牌飯局,大家一睇就知係剛陽大會,有留鬚後man爆嘅吳京,加上方力申、側田,連埋我,男子組飯局,除咗推介日式燒物鍋物之外,重點係佢哋嘅心血——《機器俠》!

小方同吳京喺呢部電影中分別飾演機械人,對佢哋嚟講都係演技大挑戰;側田就為電影唱rock味極濃主題曲,一改佢嘅pop風,人人有突破!

飯局金句:Criticize人,最緊要有point


今晚我約埋小方(右)、吳京(左)同側田(左二)烚住燒住傾《機器俠》,估唔到阿田咁有心同我補祝生日,我手上嘅Oban就係佢嘅賀禮,哈哈哈!真係知我者莫若「田」!

名酒賀禮


雖然阿田為咗買禮物遲到,但係即使佢唔係因此而遲嚟,我都唔會怪佢啦!

0

唔好睇吳京功夫底子厚,其實佢好細心㗎,呢晚佢就幫我哋烚咗好多嘢食,而且佢留港拍戲嘅個多月間,已經睇咗過20本書,係有文化嘅武術家!

我相約呢班老友去到位於太古城嘅「味竹燒肉店」,賀一賀佢哋每位嘅突破成功。最早到嘅吳京因為另一部電影《全城戒備》而留鬚,形象令人耳目一新。

一提到佢喺《機器俠》入面嘅角色,佢即時生猛晒,仲話:「我飾演嘅K-88,係一個渴望自由嘅機械人,一出場已經畀小方追殺。可能有啲觀眾睇咗預告片,會以為我係一個反派,但係其實唔係嘅,只係觀點與角度嘅問題啫。」

講吓講吓,近日為咗部戲積極宣傳嘅小方又到嘞,佢做咗成日嘢,我又點會唔細心地點定菜式畀佢醫肚呢?呢頭講完,嗰頭侍應已經端上炸蝦天婦羅凱撒沙律同螢光魷魚鹽辛畀我哋熱身同佐酒。

小方一坐低,聽到吳京講得興起,點頭附和之餘,佢又加入話題:「呢部戲係我從影以來,第一部會喺全國上映嘅電影,我好興奮㗎,因為終於有一啲成績畀到我喺北京住嘅親友睇,我daddy仲問可唔可以畀晒佢哋一齊,包一個戲院睇我嘅演出添!」

哈哈哈!衣錦還鄉自然興奮啦!喺呢個時候,姍姍來遲嘅側田終於到達,佢一嚟即刻解釋:「Paco,我去咗買禮物畀你呀!」哈哈哈!其實我嘅生日啱啱已經過咗,難得側田咁有心買咗一支蘇格蘭名牌Oban威士忌作賀禮,Thank You!

華人機甲


小方做《美女廚房》主持做得耐,今晚我就請佢客串「美男廚房」為我哋炮製燒肉!

好嘞!既然人齊我哋更加要入正題,小方今次擔正,畀到成績人睇之外,唔係唔講吓佢拍《機器俠》嘅得着呀?

「《機器俠》係華人市場中第一部以機械人為主題嘅戲,真心嘅,我有份演出已經有好大得着,首先導演Jeff(劉鎮偉)係一個好好嘅導演,佢每一場戲都會講解得好仔細,仲會做埋表情畀我參考,雖然今次係喺冇完整劇本下拍攝,但係我覺得咁樣可以令到我嘅感情嚟得真摯得多,相對嚟講壓力大咗好多。

「有好導演,拍檔都好top,好似吳京、胡軍、Ronald(鄭中基)都係最好嘅,至於同我有感情戲嘅孫儷,我識佢之前只係知佢係國內知名電視劇演員,我哋第一日喺片場見面,say完個hi就要埋位,拍攝佢喊住咁留我嘅戲份,導演一嗌action,孫儷就已經喊到一殼眼淚,我喺鏡頭外只係需要畀反應同講對白,但係嗰一刻我真係畀佢嘅演技嚇到呆咗嘞!佢好專業,好犀利!」

一直好留心聽嘅側田問小方:「咁你睇過部戲未呀?」

「未呀!等埋你一齊睇首映吖嘛!」小方同側田情同兄弟,今次《機器俠》嘅配樂由阿Mark(雷頌德)一手包辦,側田本來只係拔刀相助作主題曲,仲唱埋demo畀阿Mark,之後阿Mark對側田嘅片本照單全收,造就阿田加入「機器大軍」。

全新小方


小方同阿田情同手足,事業上合作無間,我希望嚟緊佢哋都可以再創高峰!

側田會用全新rock腔唱《機器俠》嘅主題曲,同時佢最近都製造咗全新嘅小方,近排側田為小方作曲、監製嘅〈匆匆〉熱播,阿田真係功不可沒。

小方大讚好兄弟話:「阿田監製嘅方式同我係好同步,我喺錄音室錄音一支咪,佢會喺panel嗰邊set另一支咪,會示範畀我聽,所以〈匆匆〉我哋只係錄咗兩日就搞掂。」

阿田就好謙咁回應:「其實呢個方法係台灣好出名嘅producer袁惟仁教我㗎,而且我覺得咁做會同個歌手close好多,真係好有用。」

講開袁惟仁,阿田近期都好似佢咁做歌唱節目嘅評判,等阿田講吓佢有咩做評判嘅準則。「我真係好似去produce一隻歌咁聽啲參賽者唱歌,然後講番我嘅評語出嚟啫。」

哈哈哈!隨心嘅做法係好,但係做評判最緊要畀到人睇一個權威性,喺criticize人嘅時候,最好梗係要有point,絕不能無的無矢,阿田你得嘅!乾!

味竹燒肉店

地址:香港太古城第十期金星閣1019號地下
電話:2513 8886