為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 09 月 13 日

社運內訌 阿爺大怒 范國威玩嘢玩出禍

泛民內屬於「香港本土」嘅立法會議員范國威及毛孟靜,加埋「環保觸覺」前主席譚凱邦,搞咗個聯署廣告,除刊於香港報章,仲出位到喺台灣獨派報紙《自由時報》登出,大字標題反自由行、反中國化、反赤化,又指新移民拖累香港。佢哋以為靠出位攞分,點知搞到中央高層震怒,又引發社運界大內訌,線人向本刊披露箇中內情,班友確實太過分!

線人指,幾個發起人今次搞出大頭佛,事前冇經詳細商量,由頭到尾都只係佢哋度晒橋,跟住就搵人聯署,好多人唔知會刊於《自由時報》,亦唔清楚廣告詳細內容,令部分人覺得被賣豬仔。

范國威與譚凱邦(左小圖)在台灣獨派大報登廣告反對「中國化」,嚴重超越火位,阿爺震怒;又因攻擊新移民,令一批社運人士割席。呢次亂玩嘢,終玩出禍。

據透露,佢哋考慮登邊份報紙時,有人提議喺內地同台灣同時賣廣告,最初想刊於《南方都市報》,譚凱邦亦打探過,因擔心被刪改,最後放棄咗。此時有熟悉台灣嘅網民建議,激就激到底,不如索性在「深綠」報紙刊出,可以引起好大話題,最後范國威同譚凱邦聽咗呢個意見,揀咗獨派第一大報《自由時報》刊出。見報之前一日,已有人提醒佢哋,該報「獨」味太重,會刺激北京喎,但兩人都覺得冇問題,決定去馬。

班友經費有限,最初只安排刊於《自由時報》台北及台中兩個地區版,但該報社長覺得個廣告好有意思,決定登埋桃園、基隆、宜蘭、花蓮等地區版,畀更多台灣人睇到,價錢冇加。原因好簡單,廣告嘅訊息,同「深綠陣營」反對兩岸融合嘅立場一致,變相幫佢哋宣傳。

立法會議員張超雄不滿廣告歧視新移民,收回簽名,被「本土派」臭罵。

范國威等今次同台獨陣營一個鼻子出氣,仲大大個字話「香港面對嚴重中國化,請台灣引以為鑑」,刺激埋台灣民眾「反中」,已經大大超越阿爺可容忍嘅底線,結果北京高層睇到眼火爆,認為將香港政治搞到去台灣,更挑撥台灣人同大陸敵對,實在過晒火位。

今次廣告事件除咗亂點火頭點大咗,亦令社運界內訌。有份聯署嘅立法會議員張超雄,於廣告出街前兩日,至知道佢哋將香港問題歸咎新移民,認為咁係歧視,違反佢一貫立場,所以急急將自己個名抽起。

另一聯署人士周澄,亦因一直有幫少數族裔,覺得聲明好唔妥,不過范國威話廣告已付印,抽唔到名,周澄好無奈,惟有公開自己立場,反對廣告咁講。

兩人公然「縮沙」,即時引起激進「本土派」攻擊,有本土派國師之稱嘅作家陳雲,喺facebook爆粗喪鬧,連「X街」、「冚X剷」都出埋,又咒佢哋「賣港賊落地獄」。結果激起撐張超雄同周澄嘅社運人士大反彈,不值陳雲所為,雙方繼而爆發激烈口水戰,睇嚟以後必勢如水火。