為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 09 月 04 日

高層立立亂 員工大逃亡 旺旺蔡買亞視未死心

王征插手電視台日常運作,通訊局對亞視判重刑,罰錢一百萬及勒令佢嘅「傀儡」盛品儒辭職。亞視雖然死唔服氣,但又驚個牌被釘,所以周日宣布盛品儒辭任執行董事,由《大公報》前執總雷競斌「臨危受命」頂上。

Ya叔(雷之花名)年前由王征直接聘請,乃其心腹,一到任就手執老闆令箭樣樣管,更坐入前新聞總監梁家榮個office,擺明受命控制新聞部,佢又以炮手自居,用左報文體親自撰寫《ATV焦點》,對學民思潮作出辛辣批評,廣管局收到幾萬個投訴,台內台外對佢都議論紛紛。有亞視中人指,佢近來對新聞部運作監控更嚴,以致編採部高層陸續劈炮,包括副總裁唐德全、總編輯馮兆寧等,而助理總裁伍健強亦萌去意。據透露,小事如記者請大假,都要Ya叔批准,佢亦失驚無神出席編採會議,以示係新聞部「話事人」。

亞視被通訊局判重刑,「花弗」執董盛品儒要走人,但換湯不換藥,王征心腹雷競斌隨即掌權。高層立立亂,大批員工「跳船」。股東蔡衍明(小圖)靜觀其變,對買亞視未死心。

新聞部四分五裂,士氣大受打擊,Ya叔亦趁機換血,找來《大公報》舊部、曾任職醫管局公關及多個傳媒(包括鳳凰衛視)嘅鄭鋼英,重返亞視新聞部出任採訪主任。雷鄭拍住上,聽聞鄭已開始招攬自己嘅班底。

高層立立亂,中下層亦大地震!據知亞視上周有五十幾人辭職「跳船」,大部分係幕後人員,以致製作助理幾乎斷層,留低嘅新丁要包辦寫稿同帶藝人,仲要拍外景,身兼多職。連該台台柱陳啟泰,亦表露出意興闌珊。

公司搞到一鑊粥,股東之一嘅旺旺集團主席蔡衍明亦忍唔住歎氣,其代表黃寶慧就話,佢哋在亞視董事會根本唔夠票,無法左右大局,「連看財務報告都不行,要向法庭申請,所以董事局委任甚麼人,我們也沒有足夠票數反對。」亞視董事局有九名成員,包括黃寶慧同蔡紹中(蔡衍明個仔),代表查家嘅甄紫琦及Peter Brown,其餘五人均屬王征陣營;以四敵五,點都輸!

畀人揸住條頸,旺旺蔡會唔會抽身唔玩?黃寶慧就開出一張open支票,說:「蔡老闆可以買、可以賣,又可以持有少少,只要不跟王征合作就可以,因為他的所作所為對亞視傷害很大。」問有冇搵潛在投資者傾合作,佢就大賣關子。

不過,旺旺蔡想做傳媒大亨之心路人皆見,之前佢想收購台灣壹電視但不果,睇嚟對亞視並未死心,只係等待時機重奪話事權而已。