為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 名人薈  > 名人熱話 2009 年 08 月 05 日

走過的青葱歲月

每年八月,是會考生最緊張的大日子。趁着本周放榜,讓我們翻開社交圈名人的舊相簿,看着一張張泛黃了的照片,重拾她們學生時代的快樂印記。

少年往事,無論甜的、苦的、酸的都教人回味。

廁所親熱

4
陳細潔

中學讀聖瑪加利女校的鯊魚女陳細潔,學生時代最鍾意和同學聯群結隊看鄰校聖馬竇的男生,每當有男生經過,便we嘩鬼叫。「窗口見到有男仔經過,我哋會尖叫,又會坐喺度等男仔經過。」她笑言同性戀的女同學,會在學校的廁所公然親熱,「廁所會見lesbian kiss,我都試過畀人推埋牆錫咗啖,但人哋係大姐姐,我唔敢去投訴。」

學校規定校服裙要及膝,貪靚的陳細潔,放學後,偷偷用扣針改短條裙,感覺無咁老土,「有次改短條校服裙後,在街上畀Miss撞到正,原來有同學暗中『報寸』,搞到我哋要記缺點。隔籬間國際學校仲誇張,啲女仔條裙短到睇到底褲,相對我哋啲都唔算好短啫!」


中三那年,陳細潔有天放學後與同學到中環大會堂附近(現時的環球大廈)留影。她自言是個不愛讀書的人,返學經常發白日夢。

貴氣VS深閨

4
何超雲

何超蓮

賭王三太大女何超雲同二女到外地升學前,都是於嘉諾撒聖心書院讀中學。在校內人緣甚佳的家姐超雲,每兩個月便會換新書包,Gucci、Prada、LeSportsac輪住上場,個個都是名牌子。超雲對同學亦十分豪爽,價值二萬多元的Chanel J12陶瓷手表亦樂意送給同學。

至於妹妹超蓮則十分深閨,未有因家庭背景而成為校內風頭躉,放學後會立即回家,鮮有參加課外活動。

8

超蓮返學打扮簡樸,面對傳媒追訪亦從容不迫,一派大家閨秀樣子。


超雲(中)出手闊綽又疏爽,在校內深受同學歡迎。

皇仁仔唱情歌


朱潔儀

近年醉心習畫的,早年就讀庇理羅士女子中學,性格好動的她是校內的活躍分子,體育方面尤其出色,籃球、跳高、標槍、游泳樣樣皆精,更是學校籃球隊成員,「我比較好動,加上覺得打籃球好有隊形,於是經選拔後便加入校隊。我代表學校參加過好多比賽,亦攞咗唔少獎。」

雖然就讀女校,但身材高挑、樣貌端好的朱潔儀亦有惹來鄰近的皇仁書院男生追求。「食晏時,經常同皇仁書院的男生相遇,啲男仔好主動,用紙仔傳情,有一個仲趁我行過唱英文情歌追我,幾老土呀,搞到我勁瘀又尷尬。」

朱潔儀會考成績中規中矩,其中英語及西史較出色。「學校校風好,同學在小息和午膳時間都會自動自覺溫習。平日亦會分配好時間讀書,又會買補充練習做,我喜歡早上溫書,因為較易入腦。」


朱潔儀是校內風頭躉,不同類型的課外活動組都力邀她加盟,又有名校男生追求,那時候的朱潔儀隨便擺個甫士都信心十足。

最怕體育堂


羅寶文

小時候就讀瑪利曼小學的富豪酒店集團執行董事羅寶文,肥嘟嘟十分可愛,她是校內高才生,各科成績都很理想,獨體育成績最差。「十四科攞A,但偏偏體育就得個D。我好怕上體育堂,打觔斗怕整斷條頸,打排球又怕個波殺埋嚟。但老師叫我跳二千吓繩,我真係一吓一吓咁跳。」

身形脹卜卜,寶文笑言連校服都要度身訂做。「那時瑪利曼的校服分加大、大、中、細、加細五個碼,我升上六年班時,加大碼都着唔到。結果要度身訂做,點知着新校服那天,老師話件衫成個水桶咁,冇晒cutting,結果要全部重新做過晒。」

寶文中學轉到香港國際學校就讀,成績優異的她,文筆亦十分流暢,「我寫嘢幾好,但我唔係咁鍾意寫嘢,唔知點解,一攞起支筆會好『猛』。」

multimedia3

羅寶文自小性格樂天,時常都展露燦爛的笑容。


羅寶文自三年級起,成績突飛猛進,六年級考第一名,獲校長在全校師生面前嘉許。

穿校服落D


周美鳳

周美鳳小學到中學都就讀天主教學校,記性好的她品學兼優。「我讀書好叻,中一至中三年年考第一,我做風紀長、又做班長,可能我鍾意control(控制)人。」周美鳳在女子中學就讀,身邊友人全是女生,每朝她習慣同幾個老友同學約埋一齊食早餐,有日竟被神秘雨褸怪客性騷擾。「我哋每日食完早餐,一定要經過一條巷仔返回學校,嗰次突然有個神秘怪客走出嚟,打開件衫,話『畀啲嘢』我哋睇,嚇到我哋個個高聲尖叫拔足狂奔。我哋搭巴士又撞到色狼,上學時間巴士擠迫,啲色狼會行近你身邊『頂』吓你,所以我哋好怕搭巴士,後來大家夾定早啲出門口,一係夾錢搭的士。」

讀女校的她,很少機會接觸男仔,放學後間中同友人到disco fever結識異性朋友,「我哋去Holiday Inn酒店間Disco,跳一part下午舞,下午二時到四時,第一次仲着校服落去,我呃阿媽話去補習咋,幾大膽!」

multimedia1

中一至中三讀聖加利大書院,學校開聖誕派對,周美鳳(左一)與老師同學一齊布置校園。與她感情最好的韓籍同學(右二)至今一直保持聯絡。

multimedia2

周美鳳小六讀聖博德小學,冬菇髮型係周媽媽自導自演的傑作,年中慳唔少理髮費用。

滿江紅


陳淑蘭

自小已十分鬼馬的陳淑蘭(蘭子),中學在協恩中學就讀,經常在同學面前展露搞笑本色。「當時《歡樂今宵》有個節目叫《之唔係超級市場》,我每日返到學校都會和同學玩。一日,教我中文的老師同我講:『呢間學校除了鄧萃雯外,我睇妳都係第二個入娛樂圈嘅人嘞!』」貪睡的蘭子又會詐病,到校園「病房」叉電。 成績方面,蘭子坦言不太理想,會考更滿江紅。「我會考成績唔好,不過我並無放棄自己,我知道自己唔係一個讀書的材料,所以當時我無諗過repeat。我知道自己想做一個正式的模特兒,所以我會考後就參加了一個模特兒的課程,之後又選港姐得到亞軍(同屆冠軍為李嘉欣),之後便入了娛樂圈。」


蘭子一個動作一個表情,都能為身邊友人帶來歡樂。


幼稚園時期的蘭子很驚青,生日拍照都唔識笑。

中學萬人迷


張寶華

於聖公會聖米迦勒小學就讀的張寶華(Sharon),自少成績已名列前茅,故甚得老師的愛戴。「我自小英文成績已經好好,所以教我英文的老師對我特別寵愛。」Sharon對美勞課堂亦十分認真,「記得有一年復活節,老師叫我們設計一隻復活蛋,當時我好畀心機做,點知一返到學校就畀一個男同學整爛,當時我好唔開心,仲喊到收唔到聲,點知全班同學為了o氹我開心,竟然一齊唔同呢個男仔玩,呢個畫面我到今時今日都仲記得!」

小學畢業後,Sharon就讀聖馬可中學,成績優異,「會考成績大部分科目不是A就是B,最差係數學。」Sharon中學時代大受男同學的歡迎,她笑說:「當時好多男同學約我去街,不過我通常去一次之後就唔會再同佢哋玩,因為我覺得唔啱就唔好嘥大家時間。都唔知點解細個咁多人追,大個反而冇。」


張寶華動靜皆宜,小學時期常與BMX單車為伴。


張寶華小學成績已出類拔萃,深得老師愛錫。


中學時期的張寶華長得亭亭玉立,旗袍校服更見書卷味。

朝六晚九


文詠珊

黎明愛將Janice Man(文詠珊)於荃灣區讀中學,到中五要repeat一年,於同區的紡織學會美國商會胡漢輝中學重讀。

那時Janice Man已是兼職模特兒,每天早上六時起牀上學,放學後即由荃灣趕到柴灣影樓工作,每晚到九時才收工。Janice Man:「中五之後,我已經沒有問屋企人拿零用錢了。」


小學時候的文詠珊,留齊蔭束孖辮,人見人愛。


Janice Man自小對鏡頭敏感,任何時間都可擺出cute甫士。

姿整男生


鄧達智

時裝設計師鄧達智(William)中四前在香港屯門何福堂書院就讀。「我在學校唔係一個突出的學生,讀書唔係好叻,只可說是中規中矩。不過我自細着衫就好有個人風格,唔鍾意同人撞衫,記得以前啲同學興着大領衫時,我就會着細領衫,所以細個時我都算係同學中最姿整的一個。」

William坦言每年都很期待夏天上體育課。「學校對住青山灣海灘,體育堂學游水就去沙灘,成班同學最開心。」

William完成初中課程,在父母的安排下,獨個兒到了加拿大升學,雖然他沒有參加過香港會考,但他表示亦感受到等待考試放榜的緊張心情,他說:「成績好當然開心,成績唔好的同學亦唔需要灰心,可出來找工作,然後繼續進修,只要做人有目標,始終都會做出成績來。」


夏天校服短袖恤衫襯喇叭褲,加上一個燦爛笑容,充滿陽光活力。


時裝設計師鄧達智少年時代的校服都有型過人,喇叭褲、大領恤衫,拍照時輕倚樹幹,雙手插袋,冧死女。

音樂才華


張學潤

形象指導張學潤(Nelson),中學讀香港嶺南學校,自小已受老師寵愛,對動態活動一點也不感興趣,唯獨熱愛音樂。中四那年,Nelson參加了校內舉行的歌唱比賽,憑一曲〈I Like The Song〉奪得冠軍。「其實我好細個就參加香港兒童合唱團,所以讀書時期,我的音樂成績最叻。我每年參加的課外活動只有合唱團。」 會考後,Nelson到加拿大升學,提及會考成績,他說:「其實未放榜我已經去咗加拿大,我叫朋友幫我攞成績表,最叻係英文攞到A,中文就攞B,最差就係中史和數學。」


張學潤參加歌唱比賽時情深款款獻唱。那年那月,那烏黑亮麗的秀髮,如今隨着歲月流逝已消失了。

冇得出貓


陳沛嘉

在澳門培正中學唸書的模特兒陳沛嘉(Balia),甫升上中學,身高已達160cm,全班最高,故經常被老師安排坐在最後排位置。「每次考試,眼見坐在中間位置的同學經常出貓老師都唔知。我坐最後,每次考試老師都企在我側邊,想出貓都唔得。」

冇機會出貓,令Balia每次考試都加倍努力。「澳門無會考,只要成績達到合格的分數,就可以直升入澳門大學。」


高妹陳沛嘉(右一)在同班同學中,明顯高人一等。


幼稚園時代的陳沛嘉,最開心的時刻就是學校為她舉行生日派對。「自己生日,同學生日我都好開心,因為有好多嘢食。」

真光高妹


莊思敏

模特兒莊思敏以前在真光女子中學讀書,中二時已高人一等,身高有173cm,同學都稱呼她「高妹」。她是籃球隊和田徑隊的成員,每日一早七時便返到學校練波,放學又練習,傍晚六時才離開學校,「籃球隊是學校的風頭躉,有啲同學會睇我們打波,壁報板貼上我們的相又會畀人偷,老師覺得我們比較頑皮。」

不肯透露會考成績的她,自言未如理想,之後轉到國際學校修讀商科,「大家以為國際學校好輕鬆,原來好多project做,仲辛苦過以前。」


莊思敏讀書時好動愛跳跳紮,但總是對課本提不起興趣。

肥仔變身


丁子高

公關丁子高讀聖約瑟小學時,是大肥仔一名,每餐食三至五碗飯,他最鍾意唱歌,放學返到屋企唱卡拉OK,日又唱夜又唱,但因為成績不好,被迫日日要補習,「我有三個補習老師,星期一、三、五補英文,星期二、四、六補數學,成日被補習老師打,如果數學程式唸錯咗,就用十條籐條打,好變態。」

直至升讀聖瑪加利書院,丁子高才脫胎換骨,成個人瘦晒,自信心返晒來,參加學生會、風紀、少年警訊會長和歌唱比賽,是學校的風頭躉,「小學時我無乜朋友,一入中學成個人好似開咗竅,有好多朋友,雖然中三去咗上海讀書,之後再去紐西蘭,但好多舊同學都能keep到現在仍好好感情。」

丁子高小學是肥仔一名,升中後迅速收身。由於樣子酷似周星馳電影《賭俠》裏飾演有特異功能的奸角「大軍,小圖左」,故同學都愛暱稱他做「大軍」。

校園派對


何國鉦

中學時代在香港美國國際學校就讀的時裝設計師何國鉦(Dorian),坦言每天返學猶如開派對一樣,心情興奮。「記得小學讀中文學校的時候,我的成績好差,好多科都唔合格。不過來到美國國際學校,無論成績和我返學的心情都完全唔同,科科攞A,每日返學都好開心,學生同老師打成一片。」

Dorian又爆,不少藝人、歌手都是他的師弟妹,如黎姿、吳綺莉、陳曉東和車婉婉等。「黎姿同我一班,其他的都是我師弟妹,我係佢哋的大哥哥。」


何國鉦讀國際學校接受西式教育,返學猶如開派對,心情輕鬆日日笑面迎人。