做生意食腦買Bra都分期
供樓、供車，甚至供電器，港人大都耳熟能詳，但勢估唔到連胸圍都有分期付款。早前跟個股票女經紀傾開，佢話坊間有啲胸圍店，顧客可以選擇分期供款買靚bra。
女經紀話，有次去到尖沙咀加連威老道某間店舖買胸圍，除衫前位職員姐姐已經話：「小姐，睇妳身材，呢個『bra』最適合，盛惠七百一十五蚊，但因為妳有少少寒背，需要加多件背心，三百零蚊，一張金牛就靚晒啦。」
女經紀有啲猶豫，職員姐姐見佢面有難色，隨即推介供bra計劃，話只要佢消費滿三千二百蚊，就可用東亞、滙豐同恒生信用卡做免息分期。
女職員仲落足嘴頭：「真係好抵，每個月都係二百六十六個六毫六。」佢又話，唔想一次過買足三千二百蚊都得，可先選擇畀咗呢筆錢，然後喺兩年內，買幾多扣幾多。女職員更加話，戴咗呢個胸圍有助升級，隨時大咗之後又要換bra，所以唔使擔心筆錢使唔晒。
