為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 08 月 06 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

家庭新意識

近排勁吹o靚模風,咁啱今次飯局嘅嘉賓,Lydia(唐貝詩)同Fiona(唐貝欣)都有被誤認為o靚模嘅機會,我就趁呢次嘅飯局,為佢哋澄清一吓。其實我同佢哋嘅爹哋媽咪好熟,而Patrick(梁廷鏘)同Isabella(寇鴻萍)喺蘭桂坊開設嘅意大利餐廳「PALA」開業3個月,唔推介吓點得呢?

飯局金句:保持心境!

Patrick(左二)係我嘅好酒腳之一,即係我同佢好啱傾,今晚可以與佢,加Isabella(右二)、Lydia(右一)同Fiona(左一)相聚,我嘅心情點會唔靚?

o靚模零認知

因為舊年Lydia同Fiona放暑假返香港嘅時候,分別接咗啲image girl同行show嘅job,搞到唔少朋友將佢哋歸類為o靚模,連我都覺得佢哋有啲似呀!你又估吓,佢哋點睇o靚模?

家姐Lydia話:「其實我唔係好知咩係o靚模㗎,(呢個時候Isabella話:「周秀娜嗰啲呢。」)哦!我之前都同Chrissie(周之洋名)合作過,佢幾靚吖,而且做嘢都好professional,其他就唔係好識嘞。不過,有呢啲young啲矮啲嘅model都幾好吖,佢哋冇以前嗰啲supermodel咁高,好似幫我哋出咗啖氣,咁唔係一定高先至代表靚㗎嘛。」

而細妹Fiona就不停點頭附和,再補充:「我同Angelababy行過一次show,佢都係一個好professional嘅model。」之後Lydia又話:「我覺得佢哋唔會對我阿妹有咩影響嘅,始終我哋又唔係model,我都唔諗住出寫真。」今晚反而係我學吓年輕人思維嘅機會,你點諗到Lydia會答得咁率真吖?哈哈哈!

好嘞!既然兩姊妹都無意向model界進軍,咁佢哋自己又有乜目標?今次Fiona答先:「我9月先至入U,讀International Management,依家喺媽咪公司返暑期工都係做啲advertising嘅工作,我諗我畢業之後,多數都係會幫屋企手。」

雖然家姐好多時都做model嘅工作,但係佢話:「做model始終唔係我嘅工作,以前諗住試吓啫,依家幫媽咪公司搞marketing,我覺得更有挑戰性,而且我仲未知道自己嘅長處喺邊,都係要試多啲先知。」

守公司規條

原本Patrick喺飯局當晚要去深圳巡視業務,但係佢話:「要留低你,我真係於心不忍,哈哈,你嚟到,我唔陪你點得?」哈哈!咁我梗係要大力推介我手上嘅烤澳洲羊架配牛肝菌意大利飯,禮尚往來啦!

哈哈哈!姊妹同心為家族生意出力,認真識諗,而Lydia同Fiona仲話我知,佢哋依家一齊返工,日日準時早上10點返到公司開工,媽咪Isabella都忍唔住讚吓囡囡:「呢樣嘢佢哋都幾叻,我只係同佢哋講過一次,無論佢哋前一晚玩到幾晏,第二日一定要準時返工;喺公司唔准傾私人電話,MSN都block埋,我想佢哋有一個工作嘅規矩,同其他同事一樣,唔會因為佢哋係我個女而有特權㗎!」

喺電訊科技咁發達嘅時候,返工唔上MSN,你以為對呢兩位姊妹係高難度動作?Lydia話:「都唔係嘅,我會喺lunch time上吓Facebook嘅,咁一間公司梗係有佢嘅規矩啦,對我嚟講,返工最大難度反而係恒心囉,因為做一個project要放好多心機落去,我要keep住對每個project都咁passionate係一個好大嘅挑戰。」

呢個時候,媽咪又要讚多Lydia一次:「我有次朝早7點幾起身,佢已經出得門口,原來佢嗰朝約咗啲friends食早餐,為咗10點準時返工,佢就將早餐時間再推前,我覺得佢呢個工作態度好啱。」

懂「自製」意粉

見過Fiona(左)同Lydia(右)就知,佢哋嘅外形其實比真人成熟好多,話晒佢哋只有21歲同18歲,你睇佢哋幾留心聽我講人生目標?

比較靜嘅妹妹Fiona,就大讚佢嘅同事:「雖然佢哋知我哋係媽咪個女,但係啲同事都冇話有咩顧忌,應該畀我哋做嘅嘢都畀我哋做;我哋做錯嘅時候,佢哋都會話番畀我哋知錯喺邊度,我返咗3個禮拜左右,已經學咗唔少嘢。」

話時話,Lydia同Fiona姊妹情深,依家一齊返工,嚟緊妹妹入U,又會搬去同家姐同住,今晚就有top爆嘅意大利菜食啫,人在英倫嘅時候,佢哋會煮咩呢?Fiona未開口,家姐已經指住妹妹話:「哈!佢淨係識叮嘢食㗎啫!我就會煮吓pasta咁……」

Fiona不甘示弱回敬家姐:「佢煮pasta,因為佢可以買好多種唔同嘅sauce,倒上啲pasta度就有唔同味啦!哈哈哈!」

連鬥嘴都一條心,我又學到唔少嘢,哈哈哈!

Lydia(右)同Fiona(左)都好鍾意食甜品,見到呢個甜品拼盤,自然食指大動。

Pala Italian Restaurant

地址:香港中環蘭桂坊1號2樓及3樓
電話:2890 6380