為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > 老總手記 2013 年 07 月 16 日

關慧玲

《東周刊》社長兼總編輯。

曹仁超有個精明媽媽

財經專欄作家曹仁超戰勝胃癌後,醫生原本叮囑他要休息三個月,不過他已經怕悶,本月初已復工,重投魚缸懷抱,更四出會好友,回復口若懸河的幽默本色。大病過後他激瘦二十磅,面頰兩邊的「財神肉」都不見了,變成面尖尖,但不少朋友都話「瘦版曹Sir」比從前更有型。

他講自己怎樣發現患癌,原來係對自己見微知著的敏感。一向饞嘴的他平日最愛吃拖羅、牛扒,可以一吃幾件停唔到口,但今年農曆新年期間發現口味有變,突然完全不想吃。至五月份,每年例行身體檢查時跟醫生提起,驗血之下才發現貧血,「之後搵到胃部有瘜肉,我已知係癌。」曹Sir話,他驗到有事時,癌細胞剛好僅僅攻入,而他也十分果斷,決定切走半個胃「止蝕」。「無論投資還是健康,都要有理智決定。」他說。

大病成醫,曹Siro依家成個專家,講解癌病變化十分詳細。他說一般胃癌多數去到痛的階段至發覺,而他自知以往生活習慣不健康,所以年年驗身,同埋十分注意身體變化,至會發現得咁快,所以手術後連化療都唔使做。曹Sir的醫生仲安慰他說,醫過好多人,多年來都沒有復發。

曹Sir切胃後復原得不錯,他飲食小心咗,食量也細得多。一碗湯,一碗麵,兩件叉燒就飽了,「最緊要食物味道濃一些。」食得少更加要吃得精,甜品他就繼續大啖吃意大利雪糕。

和曹Sir吃飯是十分過癮的事,皆因他古仔多多,也說得動聽,他今次就講了自己娘親以小博大的投資經驗。曹媽媽雖然讀書不多,卻是個精打細算的家庭主婦。早年日日買餸左慳右慳儲來一百幾十,一夠錢就拿去買股票,買完長揸唔放,多年來更只買四隻:滙豐(0005)、置地、港燈(0006)和新鴻基(0016)。曹Sir問過娘親點解,曹媽媽理直氣壯的話:「滙豐印銀紙嘅,置地係中環地王,港燈發電,新鴻基起樓,樣樣都是本港經濟命脈,你話幾重要?」

幾十年後,曹Sir有一天打開媽媽本紅簿仔,竟然發出耀眼的金光,原來當年密密「打斧頭」儲錢買的股票,已成為一筆達七位數字嘅進帳,認真不簡單也。如果齋儲現金而不作任何投資,還未計通脹的蠶食,曹Sir話兩者回報的差別可以係十倍。

或者是受了娘親的影響,曹Sir多年來教投資,都叫人「追隨趨勢」──當趨勢形成後才加入,趨勢結束後才賣出,而不要估頂或猜底;更要留意身邊事物揀股,普通人作的每一個決定,皆可令你致富或變窮。

曹媽媽趕上了社會經濟起飛、股市OK的年代,以小吃大賺個盤滿缽滿,不得不佩服她的師奶智慧。